මීගොඩ ප්‍රදේශයේ පිහිටි ගොඩනැගිලි ද්‍රව්‍ය විකිණීමේ ආයතනයක් තුළට රාත්‍රී කාලයේ ඇතුළුවු පුද්ගලයින් දෙදෙනෙක් එම ආයතනය තුළ තිබූ පෞද්ගලික සේප්පුවක් කඩා සොරකම් කර තිබූ රන් භාණ්ඩ හා රුපියල් ලක්ෂ 27 කට වඩා අධික මුදල්ද සමග අත්අඩංගුවට ගැනීමට බස්නාහිර පළාත දකුණ අපරාධ කොට්ඨාසයේ නිලධාරීන් සමත්වූ බව පොලීසිය පැවසීය.
මෙම පුද්ගලයින් දෙදෙනා හොරණ ගෝනපොළ ප්‍රදේශයේ හා හෝමාගම ප්‍රදේශයේ පදිංචි 35 වැනි වියේ පසුවන ආය බවත් මහරගම, හෝමාගම, මීගොඩ, කොට්ටාව වැනි ප්‍රදේශයන් වල රාත්‍රී කාලයේ දී වෙළඳසැල් හා උපකරණ කුලියට ලබා දෙන ස්ථාන කොල්ලකා ඇති බවත් මූලික පරීක්ෂණවලදී අනාවරණයවූ බවද පොලිසිය පැවසීය.
ඉන් එක් සැකකරුවෙකු තුසිත කුමාර නොහොත් හෝමාගම තුයියා නැමැති අනවර්ථ නාමයෙන් හඳුන්වන අයෙක් බවත් අනෙක් පුද්ගලයා සම්පත් රුවන් චාමර අල්විස් නමැති පුද්ගලයෙක් බවත් එම පුද්ගලයා පන්නිපිටිය ගුවන් පාලම මතදී කාර් රථයක ගමන් කරමින් සිටි පුද්ගලයෙකුට වෙඩිතබා ඝාතනය කිරීමේ සිද්ධියක් සම්බන්ධයෙන් බන්ධනාගාර ගතව සිට ඇප මත නිදහස්ව සිටින අයෙක් බවත් පොලිසිය විසින් සිදුකළ විමර්ශනවලදී හඳුනාගෙන ඇති බවත් පොලිසිය පැවසීය.
සැකකරුවන් විසින් කපා දමා තිබූ සේප්පුවේ කොටසක් සඟවා තිබියදී සොයාගත් බවත් ප්‍රශ්න කිරීම්වලදී කිරීම් වලදී සොරකම් කර ඇති රන් භාන්ඩ වලින් අනාවරණය කරගත් රන් පවුම් (58)
රන් පවුම් (54) සහ මුදලින් රුපියල් ලක්ෂ විසි හතක් සහ සේප්පුව කැපීමට යොදාගත් කියත් පටි, එම ආයතනයේ සී.සී.ටී.වී කැමරා පටිගත කිරීම් සඳහා යොදාගෙන තිබූ ඩි.වී.ආර් යන්ත්‍රයද බස්නාහිර දකු අපරාධ කොට්ඨාසය නිලධාරීන් විසින් සොයාගෙන ඇති බවත් පොලිසිය පැවසීය.
සැකකරුවන් හෝමාගම මහේස්ත්‍රාත් අධිකරණයට ඉදිරිපත් කර රඳවා ගැනීමේ නියෝග ලබා ගනිමින් වැඩිදුරටත් ප්‍රශ්න කර තවත් අපරාධ සිදු කර ඇද්දැයි සෙවීමට නියමිත බවද පොලීසිය පැවසීය.
සිද්ධිය සම්බන්ධයෙන් වැඩිදුර පරීක්ෂණ බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් බස්නාහිර පළාත දකුණ භාර නියෝජ්‍ය පොලිස්පති කපිල කඩුපිටිය බස්නාහිර පළාත දකුණ අපරාධ කොට්ඨාසයේ අධ්‍යක්ෂ පොලිස් අධිකාරි ලලිත් අබේසේකර පොලිස් අධිකාරී කලාප 01 රොහාන් පෙරේරා යන මහත්තුරුන්ගේ පූර්ණ අධීක්ෂණය මත බස්නාහිර පළාත දකුණ අපරාධ කොට්ඨාශයේ ස්ථානාධිපති පොලිස් පරීක්ෂක ජයන්ත පෙරේරා මහතාගේ උපදෙස් මත පොලිස් පරීක්ෂක හේමන්ත කුමාර මහතාගේ මෙහෙයවීමෙන් පොලිස් සැරයන් 40248 ප්‍රසන්න, 56951 සුනිල්, 56958 ප්‍රසන්න පොලිස් කොස්තාපල් 72338 ලලන්ත, 77688 අමිල, 81600 සමීර, 84762 කුමාර, පොලිස් කොස්තාපල් රියදුරු 20545 රණවීර, කාන්තා පොලිස් කොස්තාපල් 11297 ලක්ෂානී යන නිලධාරීන් විසින් පවත්වනු ලබයි.
සමීර අබේසිංහ – බොරලැස්ගමුව
