ඉස්ලාම් බැතිමතුන්ගේ ශාස්තෘවරයා වන ශුද්ධ වූ මුහම්මද් නබි නායකතුමාගේ උපන් දිනය සමරන සියලු ඉස්ලාම් ජනතාවට අග්‍රාමාත්‍ය මහින්ද රාජපක්ෂ මහතා ශුභාශිංසන එක් කර තිබෙනවා.
මනුෂ්‍යත්වයෙන් පිරිපුන් ගෞරවනීය මානව ප්‍රේමයක් ගොඩනැඟීමට සිය පෞද්ගලික ජීවිතය තුළින් අන් අයට ආදර්ශයක් වෙමින් කැපවූ මුහම්මද් නබි නායකතුමා ඉස්ලාම් හර පද්ධතියක් බිහි කළ නියමුවා බවයි අග්‍රාමාත්‍යවරයා පෙන්වා දෙන්නේ.
දෙවියන්ගේ දූතයෙකු ලෙස නබි නායකතුමාගේ ඉගැන්වීමේ මූලික හරය වන්නේ මනුෂ්‍ය වර්ගයාට යහපත් මාර්ගය පෙන්වා දීම බව මහින්ද රාජපක්ෂ මහතා අවධාරණය කළා.
එය අනුගමනය කරන සියලු ඉස්ලාම් ජනතාවට යහපත් සමාජයක් වෙනුවෙන් සිය දායකත්වය උපරිමයෙන් දිය හැකි බවයි අග්‍රාමාත්‍යවරයාගේ සුභාසිංෂණ පණිවිඩයේ දැක්වෙන්නේ.
කොවිඩ් වසංගතයට මුහුණ දෙමින් ගතකරන මෙවැනි දුෂ්කර කාල වකවානුවක් ජය ගැනීම උදෙසා නබි නායකතුමන්ගේ ජීවිත ආදර්ශය සමීප කරගන්නා ලෙසද අග්‍රාමාත්‍යවරයා ඉස්ලාමීය ජනතාවගෙන් ඉල්ලා සිටිනවා.
