පාර්ලිමේන්තුවේ ගෘහ පාලන අංශයේ ඇතැම් රූමත් සේවිකාවන්ට එහි සමහර ප්‍රධානීන් විසින් ලිංගික හිරිහැර කරන ලදැයි කියන සිද්ධිය සම්බන්ධයෙන් පාර්ලිමේන්තුවේ සහකාර මහලේකම් නීතිඥ හංස අබේරත්න මහතා විධිමත් පරීක්ෂණයක් (Formal inquiry) ආරම්භ කළේය.
ඔහු මෙම විධිමත් පරීක්ෂණ ආරම්භ කළේ පාර්ලිමේන්තු මහලේකම් නීතිඥ කුෂානි රෝහණදීර මහත්මියගේ දැනුම්දීම අනුවය.
සිද්ධිය සම්බන්ධයෙන් මූලික පරීක්ෂණ පැවැත්වූ කමිටුවේ වාර්තාව එහි ප්‍රධානීන් විසින් පාර්ලිමේන්තු මහලේකම්වරියට පසුගියදා බාර දෙනු ලැබීය.
එම වාර්තාවෙන් හෙළිදරව්වී ඇති කරුණු පදනම් කරගෙන මෙම විධිමත් පරීක්ෂණය ආරම්භ කළ බව පාර්ලිමේන්තු ආරංචි මාර්ගවලින් පැවසේ.
සිද්ධිය පිළිබඳව මූලික පරීක්ෂණ පවත්වනු ලැබුවේ පාර්ලිමේන්තුවේ අධ්‍යක්ෂිකා ( පරිපාලන) තච්චනා රාණි මහත්මියගේ ප්‍රධානත්වයෙන් යුතු ත්‍රිපුද්ගල කණ්ඩායමක් විසිනි. ඊට ඇතුළත්වූ අනෙක් සාමාජිකාවන් දෙදෙනාවූයේ සහකාර අධ්‍යක්ෂිකා (පරිපාලන) ඉන්දිරා දිසානායක සහ හැන්සාඩ් සංස්කාරිකා නයනි ලොකු කොඩිකාර යන මහත්මීහු වෙති.
පාර්ලිමේන්තු මහ ලේකම් නීතිඥ කුෂානි රෝහණදීර මහත්මියගෙන් සඳහන් කළේ විධිමත් පරීක්ෂණයේ වාර්තාව ලැබුණු පසු එහි නිර්දේශ අනුව සුදුසු ක්‍රියාමාර්ග ගැනීමට සියලු පියවර ගන්නා බව සඳහන් කළාය.
