ලගම පාසල හොදම පාසල ව්‍යාපෘතිය සම්බන්ධව පැමිණිල්ල පිලිබද කිසිදු විමර්ශනයක් සිදුවී නැහැ – ලංකා ගුරු සංගමය

යහපාලන ආණ්ඩුව සමයේ ලගම පාසල හොදම පාසල ව්‍යාපෘතිය ඔස්සේ රුපියල් මිලියන 500ක මුදලක් රටට අහිමිකරමින් සිදුවු වංචා සහගත ව්‍යාපෘතින් සම්බන්ධයෙන් අල්ලස් හෝ දූෂණ විමර්ශන කොමිෂන් සභාවට පැමිණිලි ඉදිරිපත්කර ඇතත් ඒ සම්බන්ධයෙන් පසුගිය ආණ්ඩු සමයේ කිසිදු විමර්ශනයක් සිදුනොවුණු බවත් වර්ථමාන රජය ඒ සම්බන්ධයෙන් විමර්ශන සිදුකර වැරදි සිදුකල පුද්ලයන්ගෙන් එම මුදල් අයකර ගැනීමට කටයුතු කලයුතු බව ලංකා ගුරු සංගමයේ සභාපති එස්.ප්‍රියන්ත ප්‍රනාන්දු මහතා පැවසුවේය.

පසුගිය සමයේ සිදුවු මූල්‍ය අක්‍රමිකතා සම්බන්ධයෙන් තමන් ඇතුළු සංගමය උතුරු මැද පළාත් හිටපු ආණ්ඩුකාරවරුන් වන සරත් ඒකනායක මහාචාර්ය තිස්ස විතාරණ යන මහත්වරුන්ට මෙන්ම අල්ලස් හෝ දූෂණ විමර්ශන කොමිෂමට පැමිණිලි ඉදිරිපත් කලත් එම වංචාවන් යටපත් කරමින් ඔවුන් කටයුතු කලබව සභාපතිවරයා අනාවරණය කලේය.

සිදුව ඇති මහාපරිමාන මුදල් වංචාවන් සම්බන්ධයෙන් වැඩිදුරටත් අනාවරණය කල ලංකා ගුරු සංගමයේ සභාපති ප්‍රියන්ත ප්‍රනාන්දු මහතා.ලගම පාසල හොදම පාසල ව්‍යපෘතියට අනුව මිලියන පහට අඩු ව්‍යාපෘති 2025ක් සදහා රුපියල් මිලියන 5604.18 වෙන්කෙරුණා.

මේ ව්‍යාපෘතිය සිදුකරන්න ඕන මධ්‍යම ආණ්ඩුව මගින්.නමුත් හිටපු ජනාධිපති මෛත්‍රීපාල සිරිසේන මහතාගේ පාලන සමයේ හිටපු උතුරු මැද පළාත් ප්‍රධාන අමාත්‍ය පේෂල ජයරත්න මහතා එම ව්‍යාපෘති පළාත් සභාවටට පවරගත්තා.

මේ ව්‍යාපෘතිවල විදුලි අළුත් වැඩියා සනීපාරක්ෂක කටයුතු ඉහල දැමිම හා ගොඩනැගිලි ඉදිකිරිම වැනි කටයුතු සිදුවුණා.එහිදි ප්‍රශ්නගතම සිදුවිම තමයි තිරප්පනය මහනාම මහ විදුහලේ ඉදිකල ගොඩනැගිල්ල.

එහි ගොඩනැගිල්ලක් තියා මුල්ගලක්වත් නැතුවා මුදල් අරගෙන තියනවා.මේ මුදල් අරගෙන තියෙන්නේ අනුරාධපුර නගරයේ ප්‍රසිද්ධ කොන්ත්‍රාත්කරුවෙකු.

අපේ සංගමය මේ සම්බන්ධයෙන් අල්ලස් හෝ දූෂණ විමර්ශන කොමිසමට පැමිණිලිකල නමුත් ඒ සම්බන්ධ පරික්ෂන ක්‍රියාත්මක නෑ.මේ කොන්ත්‍රාත්වලින් කොමිස් ගත්ත දේශාපලඥයෝ වගේම රාජ්‍ය නිලධාරින් ඉන්නවා.ඔවුන් වැරදි කරලා අද කිසිම දඩුවමක් නැතුව ඉන්නවා.

ඒ වගේම උතුරුමැද පළාත් ආණ්ඩුකාරවරුන්ව සිටි සරත් ඒකනායක මහාචාර්ය තිස්ස විතාරන යන මහත්වරුන්ට ඒ පිළිබද පැවති සාකච්ඡා වලදි සංගමය පැමිණිලිකරා.

නමුත් එතුමන්ලා ඉතාම නිහඩව හිටියා.මේ සම්බන්ධයෙන් අපකල පැමිණිලිවලට අනුව 2018 මාර්තු මාසයේ රජයේ විගණකාධි දෙපාර්තුමේන්තුව සිදුකල නියදි පරික්ෂන වලින් අනතුරුව මහනාම විද්‍යාලයේ කිසිදු ගොඩනැගිල්ලක් ඉදිකර නෑ කියලා අනාවරණය වුණා.

ගොඩනැගිලි ඉදිකිරිමේදි රජයට සිදුව තිබෙන අලාභයන් ඊට සම්බන්ධවුවන්ගෙන් අයකර ගැනිමට විගණකාධිපති දෙපාර්තුමේන්තුව නිර්දේශ කරලා තියනවා.නමුත් ඒ කිසිම දෙයක් පහුගිය ආණ්ඩු සමයේ සිදුවෙලා නෑ.

මේ නිකරුණේ විනාශවෙලා තියෙන්නේ අපේ රටේ බදු ගෙවන මිනිස්සුන්ගේ මුදල්.ඒ නිසා අපි වර්ථමාන රජයේ බලධාරින්ගෙන් ඉල්ලා සිටිනවා මේ වංචාවන් පිළිබදව සොයා බළලා වැරදිකරුවන්ට දඩුවම් කරන්න යනුවෙන් සභාපතිවරයා පැවසුවේය.

අනුරාධපුර – මහේෂ් විජේසුරිය