සැම සතියකම අධ්‍යාපන අමාත්‍යංශයට 3000ක පමණ ප්‍රමාණයක් මහජන දිනය දවසේ පැමිණෙන බවත් එම තත්ත්වය වෙනස් කිරීම සදහා දිස්ත්‍රික් මට්ටමෙන් ජනතාව සමිපයට ම ගොස් ප්‍රශ්න විසදීමට පියවර ගන්නා ක්‍රමයක් සකස් කර ඇති බවත් අධ්‍යාපන ඇමති මහාචාර්ය ජී.එල්.පීරිස් මහතා ඊයේ(18) පොලොන්නරුවේ දී පැවසීය.
පොලොන්නරුව දිස්ත්‍රික්කය හා උතුරු මැද පළාතට ආවේණික අධ්‍යාපනය හා සම්බන්ධ ගැටලු හදුනාගැනීමේ වැඩසටහනක් ඊයේ (18) පොලොන්නරුව දිස්ත්‍රික් ලේකම් කාර්යාලයේ දී පැවති අවස්ථාවේ උතුරු මැද පළාත් අධ්‍යාපන අධ්‍යක්ෂිකා නිර්මනලා ඒකනායක මහත්මිය පළාතේ පවතින තත්ත්වය පිළිබදව අදහස් දැක්වූවාය.
“උතුරු මැද පළාත තුළ ගුරු හිගය 3103ක්.පාසල් පද්ධතිය හා ගුරු මණ්ඩලය මෙහෙයවන නිලධාරින් ගත්තාම අධ්‍යාපන පරිපාලන සේවයේ නිලධාරින් 102ක හිගයක් පවතිනවා.සහය නිලධාරින් 924 ක හිගයක් තියෙනවා.ජාතික වශයෙන් ගත්තත් පළාත් වශයෙන් ගත්තත් අධ්‍යාපන පරිපාලන සේවයේ නිලධාරින් අඩුම ප්‍රමාණයක් ඉන්න පළාත් උතුරු මැද පළාත.”
මෙහි දී අදහස් දක්වමින් උතුරු මැද පළාත් ආණ්ඩුකාර මහීපාල හේරත් මහතා කතා කරමින් මෙසේ කීය.
“උතුරු මැද පළාතේ ගුරු පුරප්පාඩු දිහා බැලුවාම 3103ක්. අනුයුක්ත වෙලා තියෙන ප්‍රමාණය ගත්තාම ගුරු උපදේශකවරු 420ක් ඉන්නවා.ඒ ඔක්කොම ගුරුවරු.ඊළගට ජාතික පාසල්වලට 480ක් අනුයුක්ත කරලා ඉන්නවා අපේ ගුරුවරු. වැ‍ටුප් ගෙවන්නේ පළාත් සභාවෙන්.ඊළග ප්‍රශ්නය තමයි වැඩබලන විදුහල්පතිවරුන් මේ අයත් ගුරුවරු මේ ප්‍රශ්න විසදන්න අමාත්‍යංශය විදිහට නිසි කාලයට තරග විභාග පවත්වලා අවශ්‍ය තනතුරු පුරවන්න කටයුතු කරන්නේ නෑ.
අධ්‍යාපන පරිපාලන නිලධාරින්ගේ 102ක අඩුවක් තියෙනවා.බාගෙට භාගයක් නෑ.මේ බාගෙනුත් 46ක් වෙනත් පළාත්වල.මේ අයත් යන්න ඕන කියලා කොමිෂන් සභාවට ලියුම් ලියනවා.මුලු රටටම කන්න දෙන පිරිසක් ඉන්න දිස්ත්‍රික්ක දෙකක් මේ.මේකේ පළමු තැන අධ්‍යාපනයට දෙන්න ඕන.අධ්‍යාපන අමාත්‍යංශය මීට වඩා මේ දිස්ත්‍රික්ක දෙක දිහා බලන්න ඕන.
මෙහි දී අදහස් දැක්වූ අධ්‍යාපන ඇමති මහාචාර්ය ජී.එල් පීරිස් මහතා මෙසේ අදහස් දැක්වීය.
“අපි ජාතික පාසල් 166ක විදුහල්පතිවරුන් පත් කරන්න ලබන සතියේ ගැසට් නිවේදනයක් නිකුත් කරනවා.ඉන් පසු සම්මුඛ පරික්ෂණ පවත්වලා අපි ඉක්මනින් ඒ අය විදුහල්වලට පත් කරන්න පියවර ගන්නවා.අපේ අමාත්‍යංශයේ මහජන දිනයට 3000ක් එනවා ඉසුරුපායට.
මම අමාත්‍යංශයට උපදෙස් දුන්නා ගුරුවරු ඒ තුන්දාහ අතර තියන්න එපා කඩිනමින් විසදලා යවන්න කියලා.ඒ කළත් පීඩනය වැඩියි.ඒ නිසා තමයි අපි තීරණය කළේ ඉසුරුපායට ජනතාව එනවාට වඩා ඉසුරුපාය ජනතාව ළගට යන්න.අපි පළවෙනි එක කළා හම්බන්තොට දිස්ත්‍රික්කයේ.ඊයේ බදුල්ල දිස්ත්‍රික්කයේ.අද පොලොන්නරුව.ඒ වැඩපිළිවෙල සමග ඉතාම ඉහල ප්‍රගතියක් තියෙනවා.සමහර ප්‍රශ්න ඉක්මනින් විසදන්න පුළුවන්.මේ සාකච්චා කාලෝචිතයි.
අපිට පුළුවන් ඊළග අය වැය යෝජනා එක්ක මේ සමහර ප්‍රශ්න විසදන්න අවශ්‍ය ප්‍රතිපාදන ලබා ගන්න .තවත් ප්‍රශ්නයක් තමයි පොලොන්නරුව පුලතිසිපුර ජාතික අධ්‍යාපන විද්‍යාපීඨය ගුරුවරු හදන තැනක්.එතනත් ගුරුවරු හදන්න ගුරුවරු නෑ.තවත් ප්‍රශ්න ගණනාවක් කීවා.ඒ ගැන අපි වහාම සොයා බලා අවශ්‍ය ක්‍රියාමාර්ග ගන්නවා.”
මෙහි දී රාජ්‍ය අමාත්‍ය පියල් නිශාන්ත,රාජ්‍ය අමාත්‍ය රොෂාන් රණසිංහ ඇතුළු මැති ඇමතිවරුන් ද අමාත්‍යංශ නිලධාරින් කිහිපපලක් ද අදහස් දැක්වූහ.
ඊෂා මුදියන්සේ – පොලොන්නරුව
