කොවිඩ් 19 හෙවත් නව කොරෝනා වෛරසයේ ව්‍යාප්තිය අවම කිරිම හා අත්‍යවශ්‍ය සේවා බිඳ වැටීම වළක්වා ජන ජීවිතය අඛණ්ඩව පවත්වාගෙන යාමට කටයුතු කරන ලෙස රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍යාංශ ලේකම්වරයා සියලු දිස්ත්‍රික් හා ප්‍රාදේශීය ලේකම්වරුන්ට උපදෙස් ලබා දී තිබෙනවා.
ඇඳිරිනීතිය ක්‍රියාත්මක විම හේතුවෙන් ජනතාවට අත්‍යවශ්‍ය ආහාර හා ඖෂධ සපයා ගැනීම අපහසු වී තිබෙනවා. ඒ පිළිබඳ සලකා බලා ජනාධිපති විශේෂ කාර්ය සාධක බලකායේ උපදෙස් අනුව ක්‍රියා කරන ලෙසයි දිස්ත්‍රික් හා ප්‍රාදේශීය ලේකම්වරුන් වෙත දැනුම් දී ඇත්තේ.
තම දිස්ත්‍රික්කයේ සේවාවන් සැපයීමට විධායක මට්ටමේ නිලධාරීන්ගෙන් සැදුම් ලත් සහායක නිලධාරී කණ්ඩායමක් පත්කර ගැනීමට කටයුතු කරන ලෙස ද දිස්ත්‍රික් හා ප්‍රාදේශීය ලේකම්වරුන් වෙත යොමු කළ ලිපියෙන් අමාත්‍යාංශ ලේකම්වරයා වැඩිදුරටත් දැනුම් දී තිබෙනවා.
ඒ අනුව ආහාර හා ඖෂධ වැනි අත්‍යවශ්‍ය ද්‍රව්‍ය සුදුසු ක්‍රමවේද මඟින්ම ප්‍රදේශයේ සෑම නිවසකටම සපයා දීම අත්‍යවශ්‍ය සේවාවන්ට සහාය දෙන තොග හා සිල්ලර වෙළෙඳුන්ට ඇඳිරිනීති බලපත්‍ර ලබා දීමට පොලිස්ථාන වෙත නිර්දේශ ඉදිරිපත් කිරිම කළ යුතු වනවා.
මහා භාණ්ඩාගාරය සෑම දිස්ත්‍රික් ලේකම්වරයෙකුටම රුපියල් මිලියන 10 ක අත්තිකාරම් මුදලක් ලබා දී තිබෙනවා. එම මුදලින් තම ප්‍රදේශවල ඇති අතිරික්ත දේශීය නිෂ්පාදන මිලට ගෙන ඒවා සෙසු දිස්ත්‍රික් ලේකම්වරුන් සමඟ සම්බන්ධීකරණයෙන් ජනතාව අතර සාධාරණ මිලකට බෙදා දීමට කටයුතු කළ යුතුයි.
ගම් මට්ටමේ අවශ්‍ය සේවා සපයන ග්‍රාම නිලධාරී පවුල් සෞඛ්‍ය සේවිකා , ආර්ථික සංවර්ධන , සමෘද්ධි සංවර්ධන හා කෘෂි පර්යේෂණ සහකාර නිලධාරීන්ට කොට්ඨාසය තුළ ගමනාගමනයට අවශ්‍ය අවසර ලබා දීමේ වැඩපිළිවෙළ සම්බන්ධයෙන් පොලිස්ථානාධිපතිවරුන් දැනුවත් කළ යුතුයි.
අත්‍යවශ්‍ය සේවාවල නිරත වන්නන්ට ඉන්ධන සපයා ගැනීමට සෑම ප්‍රාදේශීය ලේකම් කොට්ඨාසයකම එක් ඉන්ධන හලක් හෝ විවෘත කර තැබිය යුතු වනවා.
රාජ්‍ය ඖෂධ නීතිගත සංස්ථාවේ ඔසුසල් නොමැති කොට්ඨාසවල පෞද්ගලික ඔසුසල් කිහිපයක් තෝරා අවශ්‍ය ඖෂධ නිවෙස් කරා බෙදා හැරීමේ යාන්ත්‍රණය සකස් කළ යුතුයි.
සෑම ග්‍රාම නිලධාරී වසමකම පවුල් සංඛ්‍යාව ආවරණය වන පරිදි අවශ්‍ය ආහාර හා ඖෂධ සපයා දීම හා ඒ පිළිබඳ අධීක්‍ෂණය කළ යුතුයි.
අවම වශයෙන් සතියකට එක් දිනක්වත් එම කොට්ඨාසයට අත්‍යවශ්‍ය ද්‍රව්‍ය ලැබෙන බවට නිලධාරීන් වග බලාගත යුතු වනවා.
දෛනික ආදායම් ලබන පුද්ගලයන් වැනි ජීවනෝපාය සලසාගත නොහැකි අවදානම් සහගත පවුල් සඳහා ප්‍රදේශයේ දානපතීන්ගේ හා ස්වෙච්ඡා සංවිධානවල සහාය ඇතිව වියළි සලාක හා අත්‍යවශ්‍ය ද්‍රව්‍ය ලබා දීමට කටයුතු කළ යුතුයි.
දානය සපයාගත නොහැකි විහාරස්ථාන හා පිරිවෙන් වෙත වියළි සලාකයක් ලබා දිමට බෞද්ධ කටයුතු කොමසාරිස් ජනරාල්වරයා කටයුතු කර තිබෙනවා.
අන්‍ය ආගමික සිද්ධස්ථාන සම්බන්ධයෙන් මෙවැනි ගැටලු පැන නගින්නේ නම් සුදුසු විකල්ප වැඩසටහන් සකස් කර බුද්ධශාසන , සංස්කෘතික හා ආගමික කටයුතු අමාත්‍යාංශයේ ලේකම්වරයා දැනුවත් කර අදාළ ප්‍රතිපාදන ප්‍රතිපූර්ණය කර ගැනීමට කටයුතු කරන ලෙසයි රාජ්‍ය පරිපාලන ස්වදේශ කටයුතු , පළාත් සභා හා පළාත් පාලන අමාත්‍යාංශයේ ලේකම් එස් හෙට්ටිආරච්චි මහතා වැඩිදුරටත් දැනුම් දී ඇත්තේ.
