අනුරාධපුර සාමවිහාරයේ ධර්ම ශාලාව පිටුපස මත්පැන් පානය කළ බව කියන කොඩිකාමම් පොලිසියේ ස්ථානාධිපතිවරයාගේ පුත්‍රයා ඇතුළු තිදෙනෙකු එහි වැඩවසන විහාරවාසි හිමිනමකට සංඝාවාසය තුළදි පහරදී තුවාල සිදුකළ බව කියන සිද්ධියට සම්බන්ධයෙන් සැකපිට පොලිස්ථානයට බාරවිමෙන් පසුව අත්අඩංගුව ගත් බව අනුරාධපුර මූලස්ථාන පොලිසියේ විවිධ පැමිණිලි අංශය පවසයි.
මෙසේ අත්අඩංගුවට ගෙන ඇත්තේ එප්පාවල පදිංචි 18 හැවරදි උසස් පෙළ හැදෑරීමට නියමිත එප්පාවල පිහිටි රජයේ පාසලක ඉගෙනුම ලබන සිසුන් තිදෙනෙකු වන අතර ඔවුන් අතර කොඩිකාමම් පොලිසියේ ස්ථානාධිපතිවරයාගේ පුත්‍රයා හා යුද හමුදා නිලධාරියෙකුගේ පුත්‍රයකු ඇතුළු තිදෙනෙකු සිටින බව පොලිසිය පවසයි.
පහරදීමට සැකකරනා තරුණයන් තිදෙනා විහාරස්ථානයේ ධර්මශාලා ගොඩනැගිල්ල පිටුපස සිට මත්පැන් පානය කර තිබෙනා අතර ඒ පිළිබදව විමසු අවස්ථාවේ හිමිනමට ප්‍රහාරය එල්ලවු බව කියමින් පොලිසියට පැමිණිලි ලැබි තිබේ.
අනුරාධපුර මහනගර සභාව ඉදිරිපිට පිහිටි සාමවිහාරයේ වැඩවසන අනුරාධපුර වලිසිංහ හරිස්චන්ද්‍ර ජාතික පාසලේ ඉංග්‍රීසි ආචාරයවරයෙකු වන පූජ්‍ය බුල්නෑවේ ධම්මික හිමියන් ප්‍රහාරයෙන් තුවාල ලබා අනුරාධපුර ශික්ෂණ රෝහලේ වාට්ටු අංක 11ප්‍රතිකාර ලබමින් සිටි.
උන්වහන්සේට තරුණයන් තිදෙනා එල්ල කළ ප්‍රහාරයෙන් නාසය කැඩි රුධිරය වහනය වන අතර එක් අතකට හා හිසට පහරදිම නිසා තැලුම් තුවාල සිදුවි ඇති බව පොලිසියට ඉදිරිපත් කළ පැමිණිල්ලේ සදහන්වේ.
පහරදුන් සැකකරුවන් තිදෙනාගෙන් එක් අයෙකු සතුව තිබූ ජංගම දුරකථනය හිමිනම විසින් උදුරාගෙන නඩු භාණ්ඩයක් වශයෙන් පොලිස්ථානයට බාරදි තිබේ.පහර කෑමට ලක්වූ හිමිනම විසින් පොලිසියට කළ පැමිණිල්ලේ සදහන්ව ඇත්තේ යාපනය කොඩිකාමම් පොලිස්ථානයේ ස්ථානාධිපති බව කියන නිලධාරියාගේ පුත්‍රයා ඇතුළු තිදෙනෙකු තමන්වහන්සේට ප්‍රහාරය එල්ල කළ බවයි.
ප්‍රහාරය සම්බන්ධයෙන් මාධ්‍යට ප්‍රකාශයක් කළ හිමිපානන්.සවස් භාගයේ තරුණයෝ පිරිසක් විහාරස්ථානයේ කථා කරමින් ඉන්න හඩ ඇහුනා.ඒ පිරිස ධර්ම ශාලාවේ පිටුපස මත්පැන් පානය කරමින් සිටියේ.මම ඇහුවා මොකද කරන්නේ කියලා.අපි අනුරාධපුර කච්චේරියට රියදුරු බලපත්‍රය ගන්න ආවා කිව්වා.
මම මගේ ජංගම දුරකථනය ගන්න සංඝාවාසයට ආව.තරුණයන් තුන්දෙනා මා සමගම පස්සෙන් ඇවිල්ලා කිව්වා කාටවත් කථා කරලා මේ සම්බන්ධයෙන් කියන්න එපා කියලා.
ඒ වෙලාවේ එක් තරුණයෙක් මට දරුණු විදියට පහර දෙන්න ගත්තා.ඔහු කිව්වා මගේ තාත්තා යාපනය ප්‍රදේශයේ පොලිසියක ස්ථානාධිපති කියලා.ඊට පස්සේ අනෙක් තරුණයන් දෙන්නත් පහර දුන්නා.
මගේ නාසයෙන් අධික ලේ ගැලීමක් තියනවා.හිස ඉතා වේදනාකාරියි දකුණු අතේ වැලමිටේ තැලීමක් තියනවා.මේ සියල්ල වෙන්නේ සංඝවාසය ඇතුලත.මම ඒ සම්බන්ධයෙන් අනුරාධපුර පොලිසියට පැමිණිලි කළා.මධ්‍යම රාත්‍රීය වන විට මට ඇතිවූ රෝගි තත්වයන් උත්සන්නවීම නිසා මම රෝහල් ගත වුණා.
මම පොලිස්පතිතුමාගෙන් ජනාධිපතිතුමාගෙන් අගමැතිතුමාගෙන් ඉල්ලා සිටින්නේ සම්බුද්ධ ශාෂනයේ අනාගතය බාරගන්න ඉන්න තරුණ හාමුදුරුවරුන් වන අපව ආරක්ෂා කරන්න.තරුණ පරපුර අධික ලෙස මත්පැන් වලට ඇබ්බැහිවෙලා ඉන්න තරුණ පරම්පරාව ඉන් මුදවා ගන්නා ලෙස මා ඉල්ලා සිටිනවා.
ඒ වගේම නීතිය අතට ගන්න කිසිවෙකුට ඉඩ තියන්න එපා.තාත්තා පොලිසියේ වුණාට තාත්තා හමුදාවේ ඔෆිසර් වුණාට කිසිම කෙනෙකුට නීතිය අතට ගන්න බෑ.මේ සිදුවීමට නීතිය හරි හැටි ක්‍රියාත්මක කරන්න යනුවෙන් උන්වහන්සේ පැවසූහ.
පහරදීම සම්බන්ධයෙන් අත්අඩංගුවට ගත් තරුණයන් තිදෙනා පොලිසියට පවසා ඇත්තේ විහාරස්ථානය පිටුපස කථා බස් කරමින් සිටියදි හිමිනම පැමිණ දුරකථනය උදුරා ගත් බවයි.
තමන් කිසිදු අවස්ථාවක මත්පැන් පානය නොකළ බවත් සිදුවිමෙන් අනතුරුව සිය මව්වරුන් සමග පැමිණ හිමිනමගෙන් දෙපා නැමද සමාව ලබාගත් බවත් ඔවුන් පොලිසියට පවසා තිබුණි.
අත්අඩංගුවටගත් එප්පාවල පදිංචි එප්පාවල පිහිටි ප්‍රසිද්ධ පාසලක ඉගෙනුම ලබන සිසුන් තිදෙනා අනුරාධපුර ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
අනුරාධපුර මූලස්ථාන පොලිසියේ ස්ථානාධිපති ප්‍රධාන පොලිස් පරික්ෂක ඊ.එම් සංජීව මහනාම මහතාගේ උපදෙස්මත විවිධ පැමිණිලි අංශයේ ස්ථානාධිපති ප්‍රධාන පොලිස් පරික්ෂක චමින්ද ගුණසේකර මහතා ඇතුළු නිලධාරින් කණ්ඩායමක් සිද්ධිය සම්බන්ධයෙන් පරික්ෂණ පවත්වති.
අනුරාධපුර – මහේෂ් විජේසුරිය
