අනුරාධපුර අධිකරණ කිහිපයක් මගින් ඇප නියම කළ හා දඩ ගෙවිමෙන් පසුව මුදාහැරෙන සැකකරුවන් රැගෙන යාමට පැමිණි ඥාතින්ට අනුරාධපුර බන්ධනාගාරය ඉදිරිපිට පෙරේදා (30දා) රාත්‍රී දහය පමණ වනතුරු රැදී සිටිමට සිදුවූවත් බන්ධනාගාරයේ අක්‍රමවත් ක්‍රියා කළාපය නිසා ඇතමුන්ට සිය ඥාතින් මුදාගැනීමට නොහැකිව ආපසු හැරී නිවෙස් වලට යාමට සිදුවිය.
අනුරාධපුර ප්‍රධාන මහේස්ත්‍රාත් අධිකරණය අතිරේක මහේස්ත්‍රාත් අධිකරණය කැබිතිගොල්ලෑව දිසා මහේස්ත්‍රාත් අධිකරණය කැකිරාව දිසා මහේස්ත්‍රාත් අධිකරණය හා තඹුත්තේගම මහේස්ත්‍රාත් අධිකරණය මගින් ඇප ලබාදුන් විශාල පිරිසක් ඇප ලබාගැනීමේ අපේක්ෂාවෙන් පෙරේදා (30දා) දහවල් එකේ පමණ සිට රාත්‍රී දහය පමණ වනතුරු බන්ධනාගාර ඉදිරිපිට බලා සිට විවිධ ප්‍රදේශවලින් පැමිණි පිරිස් නැවත හිස් අතින් නිවෙස් කරා ගියහ.
පෙරේදා (30දා) රාත්‍රී දහය පමණ වනතුරු ඇප ලැබූවන් මුදාගැනීමට බන්ධනාගාරය ඉදිරිපිට තුන් සියයක පමණ පිරිසක් බලා සිටි අතර සිය ඥාතින් මුදාගැනීමට කාන්තාවන් විශාල පිරිසක්ද පැමිණ රාත්‍රීය වනතුරුම ගේට්ටුව අභියස බලා සිට නැවත නික්ම ගියහ.පවතින සෞඛ්‍ය තත්වය මත විදීමට සිදුවු ගැහැට සම්බන්ධයෙන් ඥාතින් මෙසේ පැවසූහ.මේ ඇවිල්ලා ඉන්න මිනිස්සුන්ගෙන් විශාල පිරිසක් ඈත දුර බැහැර අය.
අපේ ඥාතින් විවිධ වැරදි සම්බන්ධයෙන් පොලිස් අත්අඩංගුවට පත්වෙලා බන්ධනාගාර ගතව සිටින්නේ.පෙරේදා (30දා) දිනයේ ඇප ලැබුවා සමහරුන්ගේ නඩු ඉවර කරලා දඩ නියම කරලා මුදාහැරියා.අපිට අධිකරණයෙන් කිවුවා බන්ධනාගාර ගේට්ටුව ළගට යන්න එතනින් දෙයි කියලා.
දහවල් එකේ ඉදන් රාත්‍රී දහය වෙනකම් මෙතන හිටියා.දැන් කියනවා අධිකරණ වලින් එවලා තියන ලේඛණවල වැරදි තියනවා මුදාහරින්න බෑ කියලා.
මෙතන ඥාතින් දෙසීයකට අධික පිරිසක් රැස්වෙලා ඉන්නවා.සෞඛ්‍ය ආරක්ෂිත ප්‍රශ්න ඇතිවෙනවා.බන්ධනාගාරයට මනුස්සයෙක් වැරද්දක් කරලා ආවම ඒ නිලධාරින් පවුල්වල මිනිස්සුන්ට සලකන්නේ පවුල් පිටින් වැරදි කරපු විදියට.
දවල් එකේ ඉදන් රාත්‍රී දහය වෙනකම් මෙතන වතුර ටිකක්වත් නැතුව ඉන්නේ.සමහර නිලධාරින්ට කිවුවම අහනවා උඹලට ඇයි පැයක් දෙකක් ඉවසන්න බැරිද කියලා.එක්කෝ නිසි ක්‍රමවේදයක් හදන්න ඕන ඒ අය නිදහස් කරන්න යනුවෙන් ඔවුන් පැවසුහ.
ඊයේ (01දා) උදෑසන සිට පෙර දිනයේ ඇප ලබාදුන් ඥාතින් මුදාගැනීමට විශාල පිරිසක් බන්ධනාගාර අධිකාරියේ ගේට්ටුව අසලට රැස්වි සිටි අතර ඊයේ දිනයෙත් කිසිදු නිසි ක්‍රමවේදයක් ක්‍රියාත්මක වන අයුරක් නොදුටු අතර බන්ධනාගාරයෙන් කළ විමසීමේදි එහි නිලධාරින් කියා සිටියේ අධිකරණ එවා ඇති ලිපිවල නම් ගම් වල අඩුපාඩු නිසා රැදවා සිටින්නන් මුදාහැරීම ප්‍රමාද වන බවයි.
මේ සම්බන්ධයෙන් අනුරාධපුර බන්ධනාගාරයේ අධිකාරි සෙනරත් සේනානායක මහතාගෙන් දුරකථනයෙන් කළ විමසීමකදි ඔහු මෙසේ පැවසුවේය.හැන්දෑවේ පහෙන් පස්සේ තමයි සැකකරුවන් මුදාහැරීමට අවශ්‍ය ලේඛණ අධිකාරියට ලැබෙන්නේ.අපි විශාල වෙහෙසක් ගන්නවා ඔවුන් ඉක්මනින් මුදාහරින්න.
නිලධාරින්ටත් මම දැඩිව උපදෙස් දුන්නා ඔවුන් කඩිනමින් මුදාහරින්න කියලා.අවුරුදු ගාණක් මේක ඇතුලේ ඉන්නවා ඥාතින්ටත් ඇප දුන්නට පස්සේ විනාඩි පහක් ඉන්න අමාරුයි යනුවෙන් ඒ මහතා පැවසුවේය.
අනුරාධපුර – මහේෂ් විජේසුරිය
