මිහින්තලය ඒ නමය ප්‍රධාන මාර්ගයේ පිහිටි ඇති සිවිල් ආරක්ෂක බලකා මූලස්ථාන කදවුරේ භට නිවස්නයෙන් මල අපද්‍රව්‍ය සහිත අප ජලය අසල පිහිටි කුඹුරු යායට මුදාහැරිමෙන් ගොවින් හතලිහකට අධික පිරිසක් දැඩි සෞඛ්‍ය ගැටළු වලට මුහුණදි ඇති බව ගොවින් පිරිසක් අනාවරණය කළහ.
සිවිල් ආරක්ෂක බලකා මූලස්ථාන කදවුරේ භට නිවස්නයෙන් දිනපතා අපද්‍රව්‍ය සහිත ජලය මුදාහැරිමෙන් කුඹුරු වලට බැසීමට නොහැකි බවත් කුඹුරු වලට බසිනා ගොවින්ගේ පාදවල ඇගිලි කරු විනාඩි කිහිපයක් ඇතුලත පුපුරා යන බව ගොවි මහතෙකු පැවසුවේය.අදාල භට නිවස්නයට යාබදව පිහිටි සින්නක්කර ඔප්පු සහිත කුඹුරු ඉඩමේ හිමිකරු මේවනවිට දැඩි පීඩාවකට පත්වි සිටිනා අතර ගොවින් 40 දෙනෙකු පමණ අප ජලය හේතුවෙන් පීඩාවිදිති.
සිවිල් ආරක්ෂ සෙබළ සෙබළියන් ස්නානය කරන ජලය ඇදුම් පැලදුම් සොදාන ජලය ඉදුල් සහිත ජලය සහ මළ අපද්‍රව්‍ය කොටස් සහිත අධික දුර් ගන්ධයක් සහිත අප ජලය කිසිදු ආරක්ෂිත ක්‍රමයක් උපයෝගි කර නොගනිමින් ඔවුන් පරිසයට බැහැර කරනා ආකාරය එහි ගිය දිනමිණට දැකගත හැකිවිය.
භට නිවස්නය ආසන්නයේම පිහිටි කුඹුරු ඉඩමට සෙබළුන් මාස ගණනාවක සිට හිස් මත්පැන් බෝතල් බීර බෝතල් බෝතල් කටු රේසර් කටු කම්බි ඇතුළු දිරා නොයන අපද්‍රව්‍ය තොග පිටින් වීසිකර තිබෙනා අයුරුද දැකගත හැකි විය.මිහින්තලය වැවේ ජලයෙන් කුඹුරු අක්කර 60ක පමණ ප්‍රමාණයක් අස්වැදුම් සිදුකෙරෙනා අතර එම ජලය ප්‍රවාහනය කරනා ඇල මාර් ගයට විෂ සහිත අපද්‍රව්‍ය ඝෘජුවම මුදාහැර තිබේ.
මේ හේතුවෙන් කුඹුරු අස්වද්දන ගොවින් පත්වි සිටින අපහසුතාව සම්බන්ධයෙන් ගොවියෙකු සිය අදහස් මෙසේ පලකළේය.සිවිල් ආරක්ෂක බලකා කදවුරේ භට නිවස්නයේ සිටින සෙබළ සෙබළියන් මුදාහරින සියළුම අපද්‍රව්‍ය එන්නේ අපේ කුඹුරු යායට.පුදුම දුර් ගන්ධයක් තියෙන්නේ.මල අපද්‍රව්‍ය කොටසත් ඇතැම් වෙලාවට එනවා.කුඹුරට බැහැපු මගේ කකුල් විනාඩි දහයක් ඇතුලත පුපුරලා ගියා.තාමත් මම බෙහෙත් කරනවා.
කුඹුරු අක්කර හැටක ගොවින් හතලිස් දෙනෙකු පමණ මේ අපජලය නිසා පීඩාවට පත්වෙලා ඉන්නේ.මේ මිනිස්සුන්ට කන්න දෙන්න වගා කරනා කුඹුරු වලට තමයි ජරාව එන්නේ.මගේ කුඹුරට වතුර ගහන ළිදට හිටත් මේ අප ජලය මිශ්‍රවෙලා තිබ්බා.මගේ කුඹුරු ඉඩමට මේ නිලධාරින් වීදුරු බෝතල් වීදුරු කටු රේසර් ඇතුළු සියළුම අපද්‍රව්‍ය වීසිකරනවා.ඔවුන්ගේ කදවුරු ලස්සනට පිරිසිදුවට තියාගන්නේ මේ ආකාරයටද?
මගේ කුඹුරේ පහුගිය සමයේ අඩිය තියා ගන්න බැරුව හිටියේ මත්පැන් බීර බෝතල් බිදලා කටු විසිකරලා තිබ්බ නිසා.මම පොහොර උර තුනක් එකතු කරලා කදවුරේ නිලධාරින්ට පෙන්නුවා කරන අපරාදේ ගැන.ආපහු වෙන්න දෙන්නෑ කිවුවට සින්නක්කර ඔප්පු තියෙන අපේ ඉඩම් විනාශයි.මේ පිළිබදව දැන්වූවාම තව දවස් කිහිපයක් දෙන්න කියනවා.අපි කොහොමද මේ විදියට රස්සාව කර ගන්නේ යනුවෙන් ඒ මහතා පැවසුවේය.
මේ සම්බන්ධයෙන් කදවුර අණදෙන නිලධාරි ලුතිනන් කමාන්ඩර් කන්දේගෙදර මහතාගෙන් දුරකථනයෙන් කළ විමසිමකදි මෙසේ පැවසුවේය.අපි මල අපද්‍රව්‍ය මුදාහරින්නෑ.ඒවා ගලි මගින් ඉවත් කරනවා.මේ දවස්වල නිදහස් දිනය වෙනුවෙන් සෙබළුන් පිරිසක් පුහුණුව ලබනවා ඒකයි ඔය ප්‍රශ්නය.මම ගොවින්ටත් කිවුවා මට 28දා වෙනකම් කල් ලබාදෙන්න කියලා.මම කඩිනමින් ඊට පියවර ගන්නවා යනුවෙන් ඒ මහතා පැවසුවේය.
අනුරාධපුර මධ්‍යම විශේෂ – බී.එම්.විජේසුරිය
