හය හැවිරිදි සහෝදරිය සමග සමඟ නිවසේ සිටි 12 හැවිරිදි පාසල් සිසුවෙකුගේ සිරුර කුඩා රෙදි කැබලි දෙකකින් (නැප්කින්) සාදාගත් පටියක් මගින් මදුරු දැල එල්ලීම සඳහා උපයෝගි කරගන්නා කොක්ක මත එල්ලෙමින් තිබෙන දුටු දෙවෙනි මව දරුවා එයින් ගලවාගෙන රෝහලට ඇතුළත් කරනවිටත් මියගොස් සිටි බව පිළියන්දල පොලීසිය පැවසීය.
සිද්ධියෙන් මියගොස් ඇත්තේ කැස්බෑව තානායම පාර පදිංචිව සිටි කවින් සඳරු විජේවර්ධන යන දොළොස් හැවිරිදි සිසිසුවෙක් බවද පොලිසිය පැවසීය.
මියගිය දරුවා පියාගේ පළමු විවාහයේ දරුවෙකු බවට මූලික පරීක්ෂණවලදී අනාවරණයවු බවත් පියා රැකියාවටද මව වෙළඳසැලකටද ගොස් සිටි අවස්ථාවේදී මෙම සිදුවීම සිදුවී ඇති බවට නිවැසියන්ගේ ප්‍රකාශවලින් අනාවරණ වූ බවද පොලිස් නිලධාරියකු පැවැසීය.
මව වෙළඳසැලට ගොස් නිවසට පැමිණ දරුවා පෙනෙන්නට නොසිටීම හේතුවෙන් දරුවා පිළිබඳ සොයා බැලීමේදී නිවසේ නාන කාමරයද පරික්ෂාකර ඉන් අනතුරුව දියණියගෙන් විමසීමේදී සිය සහෝදරයා හැංගී ඇති බවට ඇය විසින් ප්‍රකාශ කළ බව මව ලබාදුන් ප්‍රකාශයක සඳහන් බවද පොලිසිය පැවැසීය.
කුඩා දරු දෙදෙනාට නිවසේ වෙනම වෙන්කර තිබෙන කාමරයට පැමිණි මව දරුවාට කතාකර බැලීමේදී දරුවාගේ සිරුර ඇඳ ඉහළ සිවිලිමේ මදුරු දැල එල්ලන යකඩ කොක්කේ කුඩා රෙදි කැබලි එක්කර ලණුවක් ආකාරයෙන් තැනූ ( නැප්කින්) දෙකකින් එල්ලෙමින් තිබෙනු දැක වහා ක්‍රියාත්මක වී අවට ප්‍රදේශවාසීන්ගේද සහාය ඇතිව දරුවා එයින් මුදාගෙන අසල්වාසී පුද්ගලයකුට අයත් ත්‍රීරෝද රථයකින් පිලියන්දල දිසා රෝහලට රැගෙන ගොස් ඇති අතර රෝහලේදී දරුවා පරික්ෂා කර බැලූ වෛද්‍යවරුන් දරුවා මියගොස් සිට ඇති බව පවසා තිබූ බව පොලිසිය පැවසීය.
දරුවාගේ සිරුර එල්ලෙමින් තිබූ ඇඳ මත කුඩා ප්ලාස්ටික් බංකුවක් ද තිබී ඇති අතර එම බංකුව උඩුබැලි අතට පෙරළී තිබූ බවද පොලිසිය විසින් සිදුකළ සිදුකළ පරීක්ෂණයේදී හමුවූ බවද පොලීසිය පැවසීය.
දරුවාගේ මෙම හදිසි මරණය සම්බන්ධයෙන් සැකයක් පවතින බව දරුවාගේ පියා පවසන බව පොලීසිය සඳහන් කරයි .
මියගිය දරුවාගේ ගෙල දෙපස කළු පැහැ ගැන්වී ඇති බවට පරික්ෂා කිරීමේදී දැක ගත හැකි වූ බවද පරීක්ෂණ පැවැත්වූ පොලිස් නිලධාරීන් වැඩිදුරටත් පැවසීය
සිද්ධිය වූ ස්ථානයේ ස්ථානික පරීක්ෂණය සදහා පැමිණි කැස්බෑව වැඩබලන මහේස්ත්‍රාත් කේශා ජයවර්ධන මහත්මිය මළ සිරුර කළුබෝවිල ශික්ෂණ රෝහලේ තැන්පත් කර වැඩිදුර පරීක්ෂණ පවත්වන ලෙස පොලිසියට නියෝග කළේය.
ගල්කිස්ස කොට්ඨාස භාර ජ්‍යෙෂ්ඨ පොලිස් අධිකාරී රොහාන් ප්‍රේමරත්න, පොලිස් අධිකාරී සමන්ත වෙදගේ ,මහත්වරුන්ගේ අධීක්ෂණය මත පිලියන්දල පොලිස් ස්ථානයේ ස්ථානාධිපති ප්‍රධාන පොලිස් පරීක්ෂක සනත් රංජිත් මහතාගේ උපදෙස් මත පරිපාලන අංශයේ ස්ථානාධිපති ප්‍රධාන පොලිස් පරීක්ෂක කොඩිතුවක්කු මහතාගේ මෙහෙයවීමෙන් පොලිස් කොස්තාපල්වරුන් වන (87669) ජයරත්න, (91905) දිනේශ් මහත්වරුන් පරීක්ෂණ පවත්වයි
සමීර අබේසිංහ – බොරලැස්ගමුව
