වෙහෙරගොඩ යායේ අනවසර ගොවිතැන් කර වැඩ වරදී

ජල ගැලුම් නිම්න ජාතික වනෝද්‍යානයේ වෙහෙරගොඩ යාය ප්‍රදේශයට අනවසරයෙන් ඇතුළු වී එහි ගොවිතැන් කිරීම සඳහා බිම් සකසමින් සිටි හා ගවයින් ඇතුළු කළ පුද්ගලයින් 10 දෙනෙකුට එරෙහිව අධිකරණ ක්‍රියාමාර්ග ගත් බව පොලොන්නරුව වනජීවී කලාප කාර්යාලය කියයි.

එහි විශේෂ වැටලීම් ඒකකයේ ප්‍රධානි අඩවි ආරක්ෂක කුමාරසිරි විජේකෝන් මහතා ඇතුලු පිරිසකට ලැබුණු තොරතුරක් මත පෙරේදා(01) වෙහෙරගොඩයායේ කුඹුරු සකසමින් සිටි පුද්ගලයින් 09 දෙනෙකු සහ ගවයින් ඇතුළු කළ එක් පුද්ගලයෙකු හඳුනාගෙන අධිකරණ නියෝගයකින් වනජීවීන්ට සන්තකය පවරා දුන් ඉඩම් යලි අපහරණය කිරීමට එරෙහිව බී අංක 164/21 යටතේ පෙරේදා (01) දහවල් මනම්පිටිය සංචාරක මහේශ්‍රාත් අධිකරණයට කරුණු වාර්තා කළ හ.

එහි දී පොලොන්නරුව මහේශ්‍රාත් හා මනම්පිටිය සංචාරක මහේශ්‍රාත් දෙවිකා චතුරංගනී ජයවර්ධන මහත්මිය නියෝග කළේ සැකකරුවන් ට එරෙහිව නීතිමය ක්‍රියාමාර්ග ගන්නා ලෙසයි.තව ද සැකකරුවන් පිළිබඳව පොලිසියට පැමිණිල්ලක් ගොණු කරන ලෙසත්  ලබන 2021 ජුනි මස 17 වනදාට සැකකරුවන් අධිකරණය හමුවට පමුණුවන ලෙසත් නියෝග කළා ය.

ජල ගැලුම් නිම්න ජාතික වනෝද්‍යානයේ වෙහෙරගොඩ යාය ප්‍රදේශයේ අනවසරයෙන් ඇතුළු වී ගොවිතැන් කළ පුද්ගලයින් 219 දෙනෙකුට එරෙහිව නඩු පවරා අධිකරණ නියෝගය මත එම ප්‍රදේශය යලි අනවසර වගා කරුවන්ගෙන් මුදා ගෙන වනජීවීන් ට පැවරීම සිදු කළ ද නැවත වරක් අමාත්‍ය මණ්ඩල පත්‍රිකාවක් අනුව යැයි කියමින් ප්‍රාදේශීය දේශපාලනඥයින් හා එතැම් රාජ්‍ය නිලධාරින් කිහිපදෙනෙකුගෙත් වුවමනා මත  ජාවාරම්කාර වගා කරුවන් කිහිප දෙනෙකු මෙසේ ජාතික වනෝද්‍යානයට ඇතුළු වී යලි බලහත්කාරයෙන් කුඹුරු අස්වද්දමින් සිටිය දී මෙම පුද්ගලයින් 10 දෙනා නිරීක්ෂණය වී ඇත.

ඉන් පසු ඔවුන් සිදු කරන වන අපරාධය පිළිබඳව දැනුම්වත් කර මුදා හැර මෙසේ අධිකරණ නියෝගයකින් මුදා ගත් වනජීවී කලාපය යලි අපහරණය කිරීම නිසා අධිකරණයට යම් අපහාසයක් වී දැයි යන්නත් කැබිනට් සන්දේශයෙන් දක්වා ඇත්තේ ප්‍රාදේශීය ලේකම්වරුන් හා දිසාපතිවරුන් යටතට පත් කොට ඇති රජයේ අවශේෂ කැලෑ සම්බන්ධව වුවත් මොවුන් වනජීවී කලාප අපහරණය කිරීම බරපතල කරුණක් බවත් වනජිවී නිලධාරිහු කියති.

අධිකරණ නියෝග මත ජලගැලුම් නිම්න ජාතික වනෝද්‍යානයේ වෙහෙරගොඩයාය ප්‍රදේශයට ඇතුළු වී එහි ගොවිතැන් කටයුතු කිරීම සඳහා බිම් සැකසූ 09 කු හා ගවයින් ඇතුළු කළ එක් පුද්ගලයෙකු ට එරෙහිව නීතිමය ක්‍රියාමාර්ග ගන්නා බවත් සිද්ධිය සම්බන්ධයෙන් පොලිසියට පැමිණිල්ලක් ඉදිරිපත් කරන බවත් පොලොන්නරුව වනජීවී සහකාර අධ්‍යක්ෂ කාර්යාලයේ විශේෂ වැටලීම් ඒකකය පැවසීය.

කෙසේ වෙතත් මෙම ප්‍රදේශය වනජීවින් ට පෙවරීමෙන් පසු එහි නව වන වියනක් ඇති කිරීම සඳහා මීට මාස 2 කට පමණ ඉහත දී පරිසර සංවිධාන හා ප්‍රදේශවාසීන් ද එක්ව වන ජීවී නිලධාරින් රුක් රෝපන වැඩසටහනක් ද ක්‍රියාත්මක කළහ.

එම රෝපණය කළ පැළ ද විනාශ කර  මෙසේ යලි එම ඉඩම් අපහරණය කරමින් සිටින බව ද එම කාර්යාලය වැඩි දුරටත් කීය.

ඊෂා  මුදියන්සේ – පොලොන්නරුව