මහවිලච්චිය ප්‍රාදේශිය ලේකම් කොට්ඨාශයට අයත් ථෙතිහාසික තන්තිරිමලය බෝගොඩ ප්‍රදේශයේ පිහිටි පරිසර සංවේදි කලාපයක වන නිදහන්ගල උච්චවේලි ඇතුළු රජයේ රක්ෂිත රැසක් කැලෑ පාළුවන් පිරිසක් එක්ව එළිපෙහෙලි කර අත්පත්කර ගැනීමට සූදානම් වන බවත් මේ වනවිට එම පිරිස පෞද්ගලිකව මුදල් ගෙවා ගූගල් තාක්ෂණය ඔස්සේ මැන ස්ථාන පවා ඔවුන් වෙන්කර ඇති අයුරු දැකගත හැකිවිය.
තන්තිරිමලය පොලිස්වසමේ 367 දෙමටමල්වැව ග්‍රාමනිලධාරි කොට්ටාශයේ උච්චවේලි රක්ෂිතය නිදහන්ගල පුරාවිද්‍යා රක්ෂිතය ඇතුළු විශාල වනගහනයක් සහිත පරිසර සංවේදි කලාපයේ අක්කර විස්සකට අධික භූමියක් කිසියම් පිරිසක් විසින් සිය හිතුමතයට මැනීම් සිදුකර අත්පත්කර ගැනීමට යන බවට ගම්මුන් කළ දැන්වීමකට අනුව එහි ගියහ.
පුරාවිද්‍යා රක්ෂිත ප්‍රදේශයක් වන එම ප්‍රදේශය පුරා පුරාවිද්‍යාත්මක නටඹුන් විශාල ලෙස දක්නට ලැබුණු අතර නිදන් සොරුන් විසින් නිදන් ලබාගත් ස්ථාන රැසක් විශාල ගල්පර්වතයේ දක්නට ලැබුණි.
රාජ්‍ය ආයත කිහිපයක්ම මුදලට යටවෙමින් කැලෑව විනාශ කිරිමේ නිර්දේශ ලබාදීමට සූදානමින් සිටියත් එම ප්‍රදේශයන් වන අලින් ඇතුළු දුර්ලබ පක්ෂින් රැසක් හා වනසතුන් විශාල වශයෙන් ගැවසෙනා ප්‍රදේශයක් බව ගම්මුන් සාක්ෂි සහිතව පෙන්විමට කටයුතු කළහ.
ප්‍රදේශයේ වැඩවසනා චීවරධාරියෙකු නවක පාර්ලිමේන්තු මන්ත්‍රීවරයෙකු සමග කිට්ටු සබධතා පවත්වන කැලෑ පාළුවන් පිරිස තන්තිරිමලය බෝගොඩ ප්‍රදේශය ඇතුළු ස්ථාන රැසක කැලෑ එළි පෙහෙලි කරමින් දැඩි පරිසර හානියක් සිදුකරනා බවත් පිරිසකගේ උත්සාහය භූවිද්‍යා හා පතල් කාර්යංශයේ පුරාවිද්‍යා වනජීවි වන සංරක්ෂන නිලධාරින් සතුටු කර ඉඩම් අල්ලාගෙන මහපරිමාන ගල්කොරි පැවත්වීම බව ඔවුන් අනාවරණය කළහ.
භූවිද්‍යා පතල් කාර්යංශයේ අනුරාධපුර කාර්යාලයේ නිලධාරියෙකු ව්‍යාජ නම් යොදා ගනිමින් මහා පරිමාන ගල්කොරි තැනින් තැන ආරම්භ කරමින් පරිසරය දැනටමත් විනාශ කරනා බව ඔවුන් පැවසූහ.
පරිසර සංවේදි කාලපයක් වන මෙම ප්‍රදේශය වන සංහාරයකයන්ගෙන් බේරාදෙන ලෙස අහිංසක ගම්වැසියන් බලධාරින්ගෙන් ඉල්ලා සිටින අතර ඔවුන් ඒ සම්බන්ධයෙන් මෙසේ පැවසුවේය.බුදුන්වහස්සේ දේශනා කරපු ධර්මයේ සදහන් වනවා පරිසරය රැකගන්න කියලා නමුත් චීවරධාරියෙකු කැලෑ කපන්න පරිසරය විනාශ වෙන ආකාරයට කළුගල් කඩන්න ගෝල බාලයන්ට අවසර අරගෙන දෙන්න වෙහෙසෙනවා.
මේ කරන ක්‍රියාවන් නිසා හැමදාම අපහසුතාවට පත්වෙන්නේ අපි පත්කරපු රජයේ ජනාධිපතිතුමා අගමැතිතුමා ඇතුළු පිරිස.මේ අපරාධ එතුමන්ලා දන්නෙවත් නෑ.එතුමන්ලාගේ නම් විකුණ විකුණ කැලෑ විනාශ කරනවා.15ක විතර කණ්ඩායමක් එක්කහු වෙලා ඉන්නවා මේ සංවේදි පරිසර කළාපය මුළුමනින්ම විනාශ කරන්න.මේ නිදහන් ගල ආසන්නයෙන් තියෙන කැලෑවේ උකුස්සෝ කූඩු හදලා තියනවා.සැළලිහිනියෝ වලිකුකුල්ලු කුරුළු විශේෂ රැසක් ඉන්නවා.
කුරුල්ලන්ගෙ කිචි බිචි ශබ්දය පේනවනේ.ඊට අමතරව කැලෑවේ වන අලි විශාල රංචු ඉන්නවා.මුවෝ වල්ඌරෝ මීමින්නෝ ඉත්තෑවෝ හාවෝ විශාල වශයෙන් ගැවසෙනවා.මේ කැලෑවල් හිතුමතේ කපලා දැම්මම මේ පරිසරය සමතුලිත කරන සත්තු ඉන්නේ කොහෙද?
උච්චවේලි කන්දේ වනවාසීව භාවනා කරන හිමිනමක් ඉන්නවා.ඔය කැලෑ පර්වත සියල්ල විනාශ කරන්න තමයි දැන් අවසර ඉල්ලලා තියෙන්නේ.ඒ.ජී.ඒ නෝනට මේ අය බලපැම් කරලා බයකරගෙන වැඩ කරගන්නවා.
හරි විදියට පරිසර නියමයන් පිළිපදිමින් ගල් වලවල් පවත්වාගෙන යන ස්ථාන දෙකක් තුනක් තියනවා නමුත් අක්කර විස්සක් විතර වනසලා ගල් කොරි දාන්න ගියොත් මේ පරිසරයට මොනවා වෙයිද?දැනටත් වන අලි ගම්වදිද්දි කැලෑව ශුද්ධකරාම වන අලියෝ ඇවිල්ලා අපේ ගෙවල් වල පදිංචිවෙයි.
ජාවාරම්කාරයෝ සල්ලි හම්බකරගෙන හොද හොද පළාත්වල ජීවත් වෙයි.අපේ දරුවන්ගේ අනාගතයට මොකද වෙන්නේ යනුවෙන් ඔවුන් ප්‍රශ්න කළහ.තන්තිරිමලය දෙමටමල්ගම පුරාවිද්‍යා පරිසර සංවේදි කලාපයන් විනාශ වන අන්දමින් ඉඩම් කොල්ලකරුවන් ඉඩම් අත්පත්කර ගැනීමට උත්සහ කරද්දි රාජයේ නිලධාරියා වශයෙන් නිහඩව සිටින්නේ මන්දැයි මහවිලච්චිය ප්‍රාදේශිය ලේකම් මංජරි සී මලවරආරච්චි මහත්මියගෙන් දුරකථනයෙන් කළ විමසීමකදි ඇය මෙසේ පැවසුවාය.
ඔය අනාවරණය කරනකම් මම එහෙම සිද්ධියක් වෙලා කියලා දන්නෑ.අපි කිසිම මැනීමක් සිදුකරලා නෑ රක්ෂිත කැලෑවේ.මගෙන් විශාල පිරිසක් ඉල්ලීම් ලිපි යොමුකරලා තියනවා.අනිත් රාජ්‍ය ආයතන තමන්ගේ වගකීම හරියට ඉටුකරමා මට කිසිම ප්‍රශ්නයක් නෑ රාජකාරි කරන්න.
මම කාටවත් බයේ රාජකාරි කරන්නෑ.මේ ඉඩම් සියල්ලම මල්අතු ඔය ජලාශයෙන් ඉඩම් අහිමිවන අයට දෙන්න තියන ඉඩම්.ඒවා කාටවත් දෙන්න විදියක්නෑ.මට මේ සතියේ ඒ ප්‍රදේශයට යන්න විදියක් නෑ.මම අනිවාර්යෙන්ම නිරික්ෂණ චාරිකාවක නිරතවෙනවා යනුවෙන් ප්‍රාදේශිය ලේකම්වරිය පැවසුවාය.
අනුරාධපුර – මහේෂ් විජේසූරිය
