රුපියල් කෝටි එකහමාරක පමණ රජයේ මුදලින් සංවර්ධනය ආරම්භවූ ගොවි සංවිධාන පහක් යටතේ කුඹුරු අක්කර හාර දහසකට අධික ප්‍රමාණයක් නඩත්තුවන මානන්කට්ටිය වැවෙහි වම් ඇල සංවර්ධන කටයුතු නිසි අන්දමින් සිදුනොවන බවට ගොවීන් චෝදනා කරති.
ගලෙන්බිදුනුවැව වාරිමාර්ග කාර්යාලය සහ පළාත් වාරිමාර්ග කාර්යාලය මැදිහත්වීමෙන් ක්‍රියාවට නැංවූ ඵලදායිතා වැඩසටහන යටතේ ව්‍යාපෘතිය ක්‍රියාත්මක වන අතර මානන්කට්ටිය වැවෙහි වම් ඇල ප්‍රතිසංස්කරණ කටයුතු ආරම්භවි වසර තුනක් ගතවි ඇතත් ඇලෙහි ඇළ බැම්ම පළල් කොට ඉස්සීම සදහා බොරළු ගෙනැවිත් දමා ඇතත් එම කටයුතු සිදුනොවන බව ගොවින් පෙන්වා දුන්හ.
ගොවීන් චෝදනා කරන්නේ මහජනතාවගේ මුදල් වියදම් කොට ආරම්භ කරන්නට යෙදුණු කටයුත්ත අතරමග නතර කර දැමීම හේතුවෙන් වම් ඇළ මාර්ගය භාවිතා කරමින් කුඹුරු අක්කර 105ක ප්‍රමාණයක් අස්වැද්දූ ගොවීන්ට කබලෙන් ලිපට වැටීමට සිදුව ඇති බවයි.
ඇළ මාර්ගයේ ඇල බැම්ම ගමනා ගමන මාර්ගයක් සේ භාවිතා කොට සිය දෛනික ගමනා ගමන කටයුතු සිදුකළ පාසල් දරුවන් ඇතුළු ගම්වාසීන් රැසකට මේ හේතුවෙන් දැඩි අපහසුතා රැසකට මුහුණ දීමට සිදුව ඇති බව ඔවුන් පෙන්වා දුන්හ.
ඇළ මාර්ගය ඔස්සේ කුඹුරු අක්කර 105ක ප්‍රමාණයක් යළ මහ දෙකන්නය අස්වැද්දුවත් ඇළ මාර්ගය සංවර්ධනය කිරීම ආරම්භ කොට අතරමග නතර කර දැමීම නිසා වසර තුනකට ආසන්න කාලයක් යළ මහ දෙකන්නය වගා කළ කුඹුරු අක්කර 105ක ප්‍රමාණයෙන් අක්කර 75ක පමණ ප්‍රමාණයක් පුරන් වන්නට හැර ගොවීන්ට බලාගෙන හිඳීමට සිදුව ඇතැයි ඔවුන් පැවසූහ.
මානන්කට්ටිය ගම්මානයේ පදිංචි ටි.බි.රත්නපාල ගොවි මහතා. මානන්කට්ටිය ව්‍යාපාරයේ ගොවි සංවිධාන පහක් තියෙනවා.ඒ ගොවි සංවිධාන පහක් සමග වාරිමාර්ග දෙපාර්තමේන්තුව ගලෙන්බිදුනුවැව හා අනුරාධපුර කාර්යාල සාකච්ඡා කරලා 2018 ජූලි මාසේ ඵලදායිතා වැඩසටහන යටතේ මානන්කට්ටිය වම් ඇල ව්‍යාපාරය තෝරගත්තා 2018 වසරේ.
ගොවි සංවිධාන සමඟ වාරිමාර්ග දෙපාර්තමේන්තුව වැඩසටහන ආරම්භ කරලා ලොකුවට ඇළ කැපුවා.ඒ කියන්නේ අපේ කුඹුරු හරහා ගිය වතුර පාර දැන් යන්නැ.දැන් කුඹුරේ සිට වේල්ලට වතුර ආපහු යනවා.තාක්ෂණ නිලධාරි මහත්තුරුන්ගෙ ඉංජිනේරු මහත්වරුන් ගේ මිණුම් කටයුතු වල හොදකම තමයි ඒ.
මේ ගොඩ ගහල තියෙන බොරළු වලින් 2018 ඉදන් 2021 වෙනකම් වසර තුනක් කිසිම දෙයක් කරල නෑ.වාරිමාර්ග ඉංජිනේරු පළාත් වාරිමාර්ග ඉංජිනේරුවරු මේවා දිහා බලන් නිදිද මන්දා.අපට සිද්ධවුනු අවනඩුව ගැන ජනාධිපතිතුමාගේ අගමැතිතුමාගේ වාරිමාර්ග ඇමතිතුමාගේ අවධානය යොමු වෙන්න කියලා මම කියනවා.
මේ කටයුත්තට රුපියල් එක්කෝටි පනස් දහසක් විතර වියදම් කරලා තියෙනවා.මේවා මහජන මුදල් අවභාවිතා කිරීමක්.දැන් ගොවියෙකුට පාපැදියක යන්න බෑ.හොඳට යන්ඩ තිබ්බ පාර සම්පූර්ණයෙන්ම විනාශයි යනුවෙන් ඒ මහතා පැවසුවේය.
අනුරාධපුර – මහේෂ් විජේසූරිය
