සුඛෝපභෝගි රථයකින් නිදන් සෙවීමට පැමිණි හොර චීවරධාරියෙකු මාට්ටු

සුඛෝපභෝගි මෝටර් රථයකින් නිදන් සෙවීමට පැමිණි දේවවරමක් ඇති බව කියන චීවරධාරියෙකු සමග ගල්තලාවක් පරික්ෂා කරමින් සිටි සැකකරුවන් තිදෙනෙකු තිරප්පනය පොලිසියේ ස්ථානාධිපතිවරයා ඇතුළු නිලධාරින් පිරිසක් විසින්  සැකපිට අත්අඩංගුවට ගෙන තිබේ.

ගල්කුලම බරවාහන පුහුණු ආයතනය ඉදිරිපිට නවතා තිබූ සැකසහිත සුඛෝපභෝගි මෝටර් රථයක් පරික්ෂාකර එහි සිටි චිවරධාරියාගෙන් කළ ප්‍රශ්න කිරීම් වලදි තවත් දෙදෙනෙකු සමග නිධානයක් ගොඩගැනීමට පැමිණි බව පැවසීමෙන් පසුව පොලිස් කණ්ඩායම පරික්ෂණ අරඹා තිබේ.

තිරප්පනය පොලිසියේ ස්ථානාධිපතිවරයාට හා පොලිස් හදිසි ඇමතුම් අංශයට පුද්ගලික ඔත්තුකරුවෙකු ලබාදුන් තොරතුරකට අනුව අදාල මෝටර් රථය පරික්ෂා කිරීමේදි ගල්විදින ඩ්‍රිල් එකක් ඊට යොදන යකඩ කටු හතරක් හා පූජාවට ගෙනා බවට සැකකරනා ගම් බිත්තරයක් පොලිස් නිලධාරින්ට හමුවි තිබේ.

පසුව මෝටර් රථයේ පැමිණි සෙසු සැකකරුවන් සොයා පොලිස් කණ්ඩායම ගල්කුලම උට්ටිමඩුව ප්‍රදේශයට ගොස් ඇති අතර එම ප්‍රදේශයේ පිහිටි ගල් කොරියක් ආසන්නයේ ඇති විශාල ගල්තලාවක් මත සිටියදි සැකකරුවන් තිදෙනකෙු පොලිස් අත්අඩංගුවට ගෙන තිබුණි.ඔවුන් අතර ගල්කොරියේ හිමිකරුගේ පුත්‍රයාත් සිටි බව පොලිසිය පවසයි.

සැකකරුවන් පැමිණ අදාල ස්ථානයේ කිරි උතුරුවා පහන් දල්වා පූජා කටයුතු ආරම්භ කර තිබෙනා බවත් නඩු භාණ්ඩ වශයෙන් කිරි ඉතිරවූ කුඩා මුට්ටියක් පහනක් ත්‍රීරෝද රථයක් හා සුඛෝපභෝගි මෝටර් රථය පොලිසිය අත්අඩංගුවට ගෙන තිබුණි.

උට්ටිමඩුවේ ගල්කොරිය පවත්වා ගෙන යන හිමිකරුගේ පුත්‍රයාගේ ඉල්ලීම මත ගල්තලාවේ තිබෙන නිධානයක් ගොඩ ගැනීමට ඔවුන් පැමිණ ඇති බවට පොලිසිය සැකකරනා අතර දෙවියන් සමග වැඩකරනා බව කියන චීවරධාරියා එම කටයුත්තේ පූජා කටයුතු සදහා පැමිණ ඇති බව පොලිසිය පවසයි.

අත්අඩංගුවටගත් චීවරධාරියා තණමල්විල උස්ගල පුරාණ රජමහා විහාරයේ වැඩවසන බව පැවසූවත් අනන්‍යතාව ඔප්පුකර ගැනීමට ජාතික හැදුනුම්පත්ක් හෝ පැවිදි හැදුණුම්පත නොතිබු බව පොලිසිය කියයි.

සෙසු සැකකරුවන් අතර සිටිනා දෙදෙනෙකු තණමල්විල සූරියආර පදිංචිකරුවන් වන අතර සෙසු සැකකරු ගල්කුලම උට්ටිමඩුව පදිංචි අයෙකු බව පොලිසිය කියයි.ඔවුන් වයස අවුරුදු 41-43 වියේ පසුවන පිරිසක් බව පොලිසිය පවසයි.

අත්අඩංගුවටගත් සැකකරුවන් සිවුදෙනා පුරාවිද්‍යා පනතේ 6(1) වගන්තිය යටතේ නිදන් සෙවීමේ චේතනාවට ඊයේ (27දා) අනුරාධපුර ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.

තිරප්පනය පොලිසියේ ස්ථානාධිපති ප්‍රධාන පොලිස් පරික්ෂක ආර්.එම්.අයි.බී රත්නායක මහතාගේ උපදෙස්මත නිලධාරින් කණ්ඩායමක් හා පුරාවිද්‍යා ආරක්ෂන විශේෂ පොලිස් ඒකකයේ නිලධාරින් වන පොලිස් පරික්ෂක මහින්ද රණවීර සැරයන්වරුන් වන සෙනරත් බණ්ඩාර වීරකෝන් 36446 වැල්ලගිරිය 61274 පොලිස් කොස්තාපල් අධිකාරි 69509 ඉන්දික 47836 යන නිලධාරින් සිද්ධිය සම්බන්ධයෙන් පරික්ෂණ සිදුකරති.

අනුරාධපුර – මහේෂ් විජේසූරිය