හංවැල්ල, ඇඹුල්ගම ප්‍රදේශයේ පිහිටි ප්‍රධාන පෙලේ ටයිල් නිෂ්පාදනය කරනු ලබන ආයතනයක් ආසන්නයේදී මෝටර් රථයකින් ගමන් කරමින් සිටියදී වාහනයට මග හරස් කොට එහි ගමන් ගත් පුද්ගලයෙකුට යතුරුපැදියකින් පැමිණි ආයුධ සන්නද්ධ පිරිසක් විසින් බරපතළ තුවාල වන අන්දමින් පහර දීමේ සිද්ධියක් සම්බන්ධයෙන් සංවිධානාත්මක අපරාධ කල්ලියකට සම්බන්ධ සාමාජිකයෙකු ඇතුළු තිදෙනෙක් හබරකඩ, හා අතුරුගිරිය, පනාගොඩ, කළුතර වැනි ප්‍රදේශයන්හි දී ප්‍රහාරය එල්ල කිරීම සඳහා යොදා ගත් යතුරු පැදියක්, ත්‍රීරෝද රථයක්, ජංගම දුරකථන දෙකක්,ජීව අත්බෝම්බයක් ඇතුළු තියුණු ආයුධ රැසක් සමග අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පැවසීය.
මෝටර් රථයේ ගමන් කර ඇත්තේ පනාගොඩ ප්‍රදේශයේ ප්‍රසිද්ධ මෑන්පවර් ආයතනයක් පවත්වාගෙන යනු ලබන වෙළෙඳ ව්‍යාපාරිකයකු වන බවත් කප්පම් සිද්ධියක් මුල් කර ගනිමින් මෙම පහරදීම සිදුකර ඇති බවත් තියුණු ආයුධවලින් පහර දෙන අවස්ථාවේ දී එය පුද්ගලයකු විසින් තම ජංගම දුරකථනයෙන් වීඩියෝ ගත කර ඇති බවත් සිදුකළ මූලික විමර්ශනයේදී අනාවරණය වූ බව පොලීසිය පැවසීය.
සිදුකළ පහරදීමෙන් බරපතළ තුවාල ලද ව්‍යාපාරිකයා අතුරුගිරිය මූලික රෝහල කරා ගෙන ගොස් ඇත්තේද ත්‍රී රෝද රථයේ සිට ජංගම දුරකථනයෙන් වීඩියෝ දර්ශනය කළ පුද්ගලයා බවට අනාවරණ වූ බව පොලිසිය පැවසීය.
අත්අඩංගුවට පත් ප්‍රධාන සැකකරු ශ්‍රී ලංකාර මාවත, හබරකඩ ප්‍රදේශයේ පදිංචි 35 වන වියේ පසුවන අයෙක් බවත් අත්අඩංගුවට ගන්නා අවස්ථාවේදී ඔහු සන්තකයේ තිබී හොරෙයින් මත්කුඩු ග්‍රෑම් 05 මිලිග්‍රෑම් 450 ක් හා ඔහු ගමන් ගත් ත්‍රිරෝද රථය අත්අඩංගුවට ගත් බවත් අනෙක් සැකකරුවන් තිදෙනා දැඩිගමුව, පනාගොඩ, දොඩම්ගොඩ යන ප්‍රදේශයන්හි පදිංචි 21. 27. 34 වැනි වයස් කාණ්ඩවල පසුවන පුද්ගලයන් බවත් දොඩම්ගොඩ බෝඹුවල ප්‍රදේශයේ පදිංචි සැකකරු හමුදාවෙන් පලාවිත් ඇති සෙබලෙක් බවට අනාවරණය වූ බවත් පනාගොඩ ප්‍රදේශයේ පදිංචි සැකකරුගේ නිවස පිටුපස සඟවා තිබූ ජීව අත්බෝම්බයක් ඔහුගෙන් සිදු කළ ප්‍රශ්න කිරීමේදී සොයා ගැනීමට හැකි වූ බවද පොලීසිය පැවසීය.
මෙම පහර දීම සඳහා පැමිණි අනෙක් තිදෙනා ප්‍රධාන සැකකරුගේ ජංගම දුරකථනයේ පටිගත ව තිබූ වීඩියෝ දර්ශන ඔස්සේ සිදුකළ සිදුකළ පරීක්ෂණවලින් හඳුනාගෙන අත්අඩංගුවට ගත් බවත් ඔවුන් අතුරුගිරිය බස් නැවතුම් පොළේදී සහ දැඩිගමුව, දොඩම්ගොඩ යන ප්‍රදේශයන්හි නිවාස වල සැඟව සිටියදී අත්අඩංගුවට ගත් බව බව ද පොලීසිය පැවසීය.
මෙම සිදුවීම පසුගිය ජුනි මස (29) වැනි දින සිදුව ඇති බවත් මෙම සිද්ධියෙන් බරපතළ තුවාල ලද පුද්ගලයා මේ වන විටත් කොළඹ ජාතික රෝහලේ හදිසි ප්‍රතිකාර අංශයේ ප්‍රතිකාර ලබමින් සිටින බවත් ඔහුගේ තත්ත්වය ඉතා බරපතළ බවත් පොලීසිය පැවසීය.
පාතාල ක්‍රියාකාරකම් හේතුවෙන් මිය ගිය පාතාල නායකයන් වන අරුණ උදය පතිරණ නොහොත් සමයං නැමැති පුද්ගලයාගේ සහ දිනෙන් නුවන් මාබුලගේ නොහොත් ඌරු ජුවා නැමැති පුද්ගලයන්ගේ පාතාල කල්ලියට සම්බන්ධ ප්‍රධාන ගෝලයෙකු වන අපරාධ රැසක් සිදු කර අධිකරණය මගින් ඇප ලබා දීමෙන් අනතුරුව ඩුබායි රටට පලාගොස් සැඟව සිටින සංවිධානාත්මක අපරාධ කල්ලි සාමාජිකයෙකු වන සමරප්පුලිගේ චමින්ද බුද්ධික නොහොත් චමි නැමැති පුද්ගලයා මෙම ප්‍රහාරයට ලක්වූ ව්‍යාපාරිකයාගෙන් විටින් විට ඩුබායි රටේ සිට දුරකථන ඇමතුම් මාර්ගයෙන් කප්පම් වශයෙන් ඉල්ලූ රුපියල් ලක්ෂ 50 මුදල ලබානොදීම සම්බන්ධයෙන් කිහිපවිටක්ම දුරකථන මාර්ගයෙන් හා ගෝලයන් මාර්ගයෙන් තර්ජනාත්මක පණිවිඩ කිහිපයක් මෙම ව්‍යාපාරිකයාට ලබාදී ඇති බවත් එම පණිවිඩ කිසිවක් ගණන් නොගෙන ව්‍යාපාරිකයා විසින් කප්පම් මුදල් ලබා නොදීම හේතුවෙන් කෝපයට පත්වූ චමී නැමති පාතාල කල්ලි සාමාජිකයා විසින් මෙරට සිටින ඔහුගේ ගෝලයින් ලවා මෙම පහරදීම සිදුකර ඇති බව පොලිසිය විසින් සිදුකළ මූලික විමර්ශනවලදී අනාවරණය කර ගැනීමට හැකි වූ බවද බස්නාහිර පළාත දකුණ අපරාධ කොට්ඨාශය පැවසීය.
පහරකෑමට ලක්වූ ව්‍යාපාරිකයා ඇඹුල්ගම ප්‍රදේශයේ පිහිටි ප්‍රසිද්ධ ටයිල් නිෂ්පාදන ආයතනයකට සේවකයින් හා කම්කරුවන් ලබා දෙනු ලබන ව්‍යාපාරයක් සිදු කරන අතර එම ව්‍යාපාරය බාධාවකින් තොරව කරගැනීමට නම් මූලිකව රුපියල් ලක්ෂ 50ක කප්පම් මුදලක් සහ සෑම මසකම රුපියල් ලක්ෂ 05 බැගින් කප්පම් මුදල් තමාගේ ගිණුමට බැර කර ලබා දෙන ලෙස ඩුබායි රටට පලාගොස් සැඟව සිටින අපරාධ කල්ලි සාමාජිකයා විසින් අන්තර්ජාල දුරකතන සම්බන්ධතා හරහා මෙන්ම වට්ස්ඇප් හා ස්කයිප් තාක්ෂණය ඔස්සේ දැනුවත් කර ඇති බවත් ව්‍යාපාරිකයා ඊට කිසිදු ප්‍රතිචාර නොදැක්වූ හෙයින් මෙම ප්‍රහාරය එල්ල කර ඇති බවද අත්අඩංගුවට ගත් සැකකරුගෙන් සිදුකළ ප්‍රශ්න කිරීම්වලදී අනාවරණය කර ගැනීමට හැකි වූ බවත් පොලීසිය පැවසීය.
මෙම පහරදීම සිදු කිරීම සඳහා හංවැල්ල ප්‍රදේශයෙන් සොරකම් කරන ලද යතුරුපැදියක් උපයෝගී කරගනිමින් පුද්ගලයන් තිදෙනෙකු පැමිණ ඇති බවත් ව්‍යාපාරිකයා ගමන් ගත් වෑන් රථයට මඟ හරස් කර ඔවුන් තිදෙනා කඩු හා මන්නා පිහි වැනි ආයුධ වලින් ව්‍යාපාරිකයාට පහර දීමේදී සැකකරු එම ස්ථානයට ත්‍රීරෝද රථයකින් පැමිණ පහර දීමේ සිද්ධිය ත්‍රීරෝද රථයේම සිට රහසිගතව තම ජංගම දුරකථනයෙන් වීඩියෝ ගතකර එම දර්ශන ඩුබායි රටේහී සැඟව සිටින චමී නැමැති අපරාධ කල්ලි සාමාජිකයා වෙත යවා ඇති බවත් ඒ වෙනුවෙන් සැකකරුට මෙරට සිටින පුද්ගලයකු මාර්ගයෙන් මුදල් ලබාදී ඇති බවත් සිදුකළ ප්‍රශ්න කිරීමේදී අනාවරණය වූ බව අපරාධ කොට්ඨාශය පැවසීය.
අත්අඩංගුවට ගත් සැකකරු කඩුවෙල මහෙස්ත්‍රාත් මහෙස්ත්‍රාත් අධිකරණයට මහේස්ත්‍රාත් අධිකරණයට ඉදිරිපත් කිරීමට නියමිතව ඇත.
සිද්ධිය සම්බන්ධයෙන් වැඩිදුර පරීක්ෂණ නියෝජ්‍ය පොලිස්පති (අපරාධ ) ආයාස කරුණාරත්න බස්නාහිර පළාත දකුණ අපරාධ කොට්ඨාසයේ අධ්‍යක්ෂ පොලිස් අධිකාරී ලලිත් අබේසේකර පොලිස් අධිකාරී රොහාන් පෙරේරා මහත්වරුන්ගේ සෘජු අධීක්ෂණය මත මත බස්නාහිර පළාත දකුණ අපරාධ කොට්ඨාශයේ ස්ථානාධිපති පොලිස් පරීක්ෂක ජයන්ත පෙරේරා මහතාගේ උපදෙස් හා මෙහෙයවීමෙන් පොලිස් පරීක්ෂක හේමන්ත කුමාර,උප පොලිස් පරීක්ෂක රුක්ෂාන් බණ්ඩාර පොලිස් සැරයන් 56958 ප්‍රසන්න ,56951 සුනිල්, 21284 බණ්ඩාර, 40248 ප්‍රසන්න, 51496 බණ්ඩාර, පොලිස් කොස්තාපල් 72338 ලලන්ත, 78680 අමිල, 70471 තෙන්නකෝන්, 84762 කුමාර, 81600 සමීර යන නිලධාරීන් විසින් සිදුකරනු ලබයි.
සමීර අබේසිංහ – බොරලැස්ගමුව
