පොලොන්නරුව දිස්ත්‍රික්කයේ මේ වන විට නිරෝධායන මධ්‍යස්ථානවල සිටි පුද්ගලයින් 47 දෙනෙකු කොරෝනා වෛරසය ආසාධිතයින් බවට හදුනාගෙන ප්‍රතිකාර මධ්‍යස්ථාන වෙත යොමු කර ඇති බවත් වැලිකන්ද කොරෝනා විශේෂිත ප්‍රතිකාර මධ්‍යස්ථානයේ ප්‍රතිකාර කළ හැකි රෝගීන් සංඛ්‍යාව උපරිම මට්ටමක පවතින බවත් තවත් ආසාධිතයින් හඳුනාගතහොත් ඔවුන් වෙනත් රෝහල් කරා යොමු කිරීමට සිදු වන බවත් පොලොන්නරුව දිස්ත්‍රික් ප්‍රාදේශීය සෞඛ්‍ය සේවා අධ්‍යක්ෂ වෛද්‍ය ඩබ්.කේ.එස්.කේ.කුමාරවංශ මහතා පවසයි.
ප්‍රාදේශීය සෞඛ්‍යසේවා අධ්‍යක්ෂවරයා මේ බව පැවසුවේ පොලොන්නරුව දිස්ත්‍රික්කයේ වර්තමාන තත්ත්වය ඊයේ (14) පැහැදිලි කරමිනි.එහි දී වැඩි දුරටත් අදහස් දැක්වූ වෛද්‍යවරයා මෙසේ ද කීය.
“අද වන විට පොලොන්නරුව දිස්ත්‍රික්කයේ මිනුවන්ගොඩ කොරෝනා පොකුරේ ආශ්‍රිතයින් 43ක් නිවෙස්වල නිරෝධායනයට ලක් කරලා තිබෙනවා.ඔවුන්ගේ පී.සී.ආර්.පරික්ෂණ සියල්ල නෙගටිව්,ඒ වගේම අපි අහඹු සාම්පල් පරික්ෂාවක් කළා පී.සී.ආර්.600ක් පමණ ඒ සියල්ලම කොරෝනා ආසාධනය වී නැති බවට තහවුරු වුණා.නමුත් දිස්ත්‍රික්කය තුළ පවතින ගල්කන්ද නිරෝධායන මධ්‍යස්ථානයේ තව දුරටත් නිරෝධායනයවන පිරිස 53ක් දම්මින්න නිරෝධායන මධ්‍යස්ථානයේ 115ක් සහ කන්දකාඩු 181ක් නිරෝධායනය වෙනව.එයින් පුද්ගලයින් 47ක් කොරෝනා ආසාධිතයින් බවට හඳුනා ගෙන තිබෙනවා.
පොලොන්නරුව පුලතිසිපුර ජාතික අධ්‍යාපන විද්‍යාපීඨය නිරෝධායන මධ්‍යස්ථානයක් ලෙස යුධ හමුදාව විසින් පවත්වාගෙන යන්න කටයුතු කර තිබුණත් තවමත් එහි නිරෝධායනය සදහා පුද්ගලයින් යොමු කර නෑ.දැනට පොලොන්නරුව දිස්ත්‍රික්කයේ සාමාන්‍ය සමාජයෙන් කොරෝනා වෛරසය ආසාධිතයින් හදුනාගෙන නෑ.නමුත් මහජනතාව නිරන්තරයෙන් සෞඛ්‍ය මාර්ගෝපදේශ පිළිපැදිය යුතුයි.
අවදානමක් තිබෙනවා.ජනතා සහය නැතුව මේ කාර්යය ක්‍රියාත්මක කරන්න බෑ.ජනතාවගෙන් ඉල්ලා සිටින්නේ පුළුවන් තරම් ගමන් බිමන් සීමා කරන්න.අත්‍යවශ්‍ය දේකට හැර නිවසින් පිට නොයන්න.සෞඛ්‍ය මාර්ගෝපදේශ අනුගමනය කරන්න කියලා.” යැයි ද ඒ මහත වැඩි දුරටත් පැවසීය.
ඊෂා මුදියන්සේ – පොලොන්නරුව
