නිරිත දිග බෙංගාල බොක්ක මුහුදු ප්‍රදේශයේ පැවති ‘මැන්ඩවුස්’ සුළි කුණාටුවේ බලපෑම අදින් (10) පසු මෙරටින් ක්‍රමයෙන් පහව යනු ඇතැයි කාලගුණ විද්‍යා දෙපාර්තමේන්තුවේ අධ්‍යක්‍ෂ ජනරාල් අතුල කරුණානායක මහතා පැවසීය.
මෙම සුළි කුණාටුව අද (10) අළුයම් කාලයේ දී උතුරු තමිල්නාඩු, පුදුචෙරි සහ දකුණු ආන්ද්‍ර ප්‍රදේශ් වෙරළ තීරය හරහා ගමන් කර ඇත. එය ක්‍රමයෙන් දුර්වල වන බවද ඔහු කීය.
එසේ වුවත් අද (10) දිනයේදීත් බස්නාහිර, සබරගමුව සහ මධ්‍යම පළාත්වලත්, ගාල්ල, මාතර දිස්ත්‍රික්කවලත් විටින් විට වැසි ඇතිවන බව අධ්‍යක්‍ෂ ජනරාල්වරයා සඳහන් කළේය.
උතුරු, උතුරුමැද සහ වයඹ පළාත්වල ද වැසි වාර කිහිපයක් ඇතිවන බව කරුණානායක මහතා කීවේය.
එමෙන්ම උතුරු, උතුරුමැද, නැගෙනහිර, ඌව සහ මධ්‍යම පළාත්වල විටින් විට පැයට කිලෝමීටර 50, 60 පමණ වේගවත් තද සුළං ඇතිවන බව ද ඔහු ප්‍රකාශ කළේය.
මෙම වැසි හා සුළං තත්වය මෙන්ම පවතින දැඩි ශීත කාලගුණය ද අදින් පසු ක්‍රමයෙන් පහව ගියත් සාමාන්‍යයෙන් දෙසැම්බර් මාසයේ දී පවතින සීතල ඉදිරි දිනවලදීත් පවතිනු ඇතැයි අධ්‍යක්‍ෂ ජනරාල්වරයා කීවේය.
මෙම සුළි කුණාටුව හේතුවෙන් දිවයිනට උතුරු හා නැගෙනහිර දෙසින් වන මුහුදු ප්‍රදේශ විටින් විට රළු වන බැවින් කන්කසන්තුරය සිට ත්‍රිකුණාමලය සහ මඩකලපුව හරහා පොතුවිල් දක්වා වෙරළට ඔබ්බෙන් වන ගැඹුරු සහ නොගැඹුරු මුහුදු ප්‍රදේශවල යාත්‍රා කිරීමේදී විමසිලිමත් වන ලෙස කාලගුණ විද්‍යා දෙපාර්තමේන්තුව ධීවර හා නාවික ප්‍රජාවට දැනුම්දීමක් කරයි.
