කිසිවෙකුට විසඳිය නොහැකි යැයි පැවසු ආර්ථික අර්බුදය විසඳීමට තමන් සමත් වුවත් නිසි ආර්ථික පරිවර්තනයක් සිදු නොකර මෙම වැඩපිළිවෙළ අතරමග නතර කළහොත් යළිත් රටේ ආර්ථිකය කඩා වැටෙන බව ජනාධිපති රනිල් වික්‍රමසිංහ මහතා පවසයි.
ඒ අනුව මෙවර ජනාධිපතිවරණයේ දී ජනතාව තම අනාගතය පිළිබඳ සිතා තීන්දුවක් ගතයුතුව ඇති බවයි සමාජ මාධ්‍ය ජාලා ඔස්සේ ඉදිරිපත් වූ ප්‍රශ්නවලට පිළිතුරු ලබාදීමේ Ask Ranil වැඩසටහනට එක්වෙමින් ජනාධිපතිවරයා කියා සිටියේ.
එමෙන්ම රටට ඝීග්‍ර ආර්ථික වර්ධනයක් ළගාකර ගැනීමට නොහැකි වූයේ දේශීය ආර්ථිකයක් ගැන කථා කරමින් ජනතා විමුක්ති පෙරමුණ වැනි පක්ෂ ගෙන ගිය මතවාද නිසා බවද ඔහු මෙහිදී පෙන්වා දුන්නා.
රට හමුවේ ඇති ආර්ථික අර්බුදය විසඳීමට නම් පක්ෂ බේදයෙන් තොරව අලුතින් සිතා අලුත් වැඩපිළිවෙළකට යා යුතු බවයි එහිදී වැඩි දුරටත් අදහස් දක්වමින් ජනාධිපතිවරයා කියා සිටියා.
මෙහිදී මතු කළ ප්‍රශ්න කිහිපයක් සහ ජනාධිපති රනිල් වික්‍රමසිංහ මහතා ලබා දුන් පිළිතුරු මෙසේය,
ප්‍රශ්නය
ජනාධිපතිතුමනි, මෙවර ඔබ ජනාධිපතිවරණයට ඉදිරිපත් වීමට තෝරා ගෙන තිබෙන්නේ ගෑස් සිලින්ඩරය. ඇයි ‘අලියා’ නැතුව ‘ගෑස් සිලින්ඩරයෙන්’ ඉදිරිපත් වන්නේ?
පිළිතුර
මා මෙවර ජනාධිපතිවරණයට ඉදිරිපත් වීමට තීරණය කළේ ස්වාධීන අපේක්ෂකයකු ලෙසයි. පක්ෂ බේදයෙන් ඉවත් විය යුතු බවට අද විශාල බලපෑමක් තිබෙනවා. ඒ අනුව දේශපාලන වශයෙන් අප අලුතින් සිතිය යුතුයි.
කණ්ඩායම් රැසක් සමඟ කටයුතු කළ නිසා ස්වාධීන අපේක්ෂයකයකු ලෙස මෙවර ජනාධිපතිවරණයට ඉදිරිපත් වීමට මම තීරණය කළා. ස්වාධීන අපේක්ෂකයකුට ඕනෑම සළකුණක් තෝරා ගත හැකියි. මේ අවස්ථාවේදී හොඳම සළකුණ ගෑස් සිලින්ඩරය කියා මම හිතුවා.
ප්‍රශ්නය
ඔබතුමාට රටේ ආර්ථිකය ශක්තිමත් කරන්න පුලුවන් කියා විශ්වාස කරන පිරිසක් සිටිනවා. හැබැයි රාජපක්ෂවරුන් හා පොදුජන පෙරමුණේ සහාය ලැබීමේ හේතුව මත ඡන්දය දෙන්න මැලිවෙන පිරිසකුත් සිටිනවා. ඒ අයට දෙන පණිවිඩය කුමක්ද?
පිළිතුර
මේ කියන්නේ මොන රාජපක්ෂ ගැනද? රාජපක්ෂ නමින් අපේක්ෂකයන් තුන්දෙනක් සිටිනවා. ලක්ෂ්මන් නාමල් රාජපක්ෂ ඉන්නවා, නාමල් රාජපක්ෂ ඉන්නවා, විජයදාස රාජපක්ෂ ඉන්නවා. නමුත් ඒ එක්කෙනෙක්වත් අප සමඟ නැහැ.
2022 ජූලි මාසයට වඩා අද තත්ත්වය හොඳයිද? එසේත් නැත්නම් අද තත්ත්වය ඊට වඩා උග්‍ර වෙලාද? ආණ්ඩුව ගෙන යන්න මට පොහොට්ටුවේ සහයෝගය ලැබුණා. පොහොට්ටුවේ සහයෝගය එපා කියලා, තෙල් නැතුව, පොහොර නැතුව ඉන්න තිබුණා. ඒ ආණ්ඩුවේ වැඩකටයුතු එතනින් ඉවරයි. දැන් මැතිවරණයකට යනවා. ඔවුන් ඔවුන්ගේ මාර්ගයේ යනවා. මම මගේ මාර්ගයේ යනවා.
ලංකාවේ රාජපක්ෂලා ලක්ෂ ගණනක් ඉන්නවා. ඉන් සමහර අය මට ඡන්දය ලබා දෙන්න පුලුවන්. කෙසේ නමුත් ජනාධිපතිවරණයේදී එම පක්ෂය තීරණය කර තිබෙනවා පක්ෂයක් ලෙස වෙනම ඉදිරිපත් වීමට. අප ඉදිරිපත් වන්නේ වෙනමයි.
ප්‍රශ්නය
ජනාධිපතිතුමනි, පුල්මුඩේ ඛනිජ වැලි නිධිය, ත්‍රිකුණාමලයේ වරාය, හම්බන්තොට ගුවන් තොටුපොළ වැනි සම්පත් තිබියදී අප මුළු ලෝකයටම ණය කාරයෝ වෙලා. 75 වසරක පාලකයන් මේවායින් නිසි ප්‍රයෝජනක් ගත්තේ නැහැ කියලා විවිධ දේශපාලන පාර්ශ්ව චෝදනා කරනවා
පිළිතුර
75 වසරක් මොනවත් කළේ නැහැ කියන්න බැහැ. ජල විදුලි බලාගාර සියල්ලම හැදුවේ අපි. ගුවන් තොටුපොළවල් හැදුවා. නිදහස් අධ්‍යාපන ක්‍රමය ගෙනාවා. අවුරුදු 75ක් මොකුත් කළේ නැහැ කියලා කොහොමද මේ අය කියන්නේ. බොහෝ අය සිතුවේ දේශීය ආර්ථිකය මතින් පමණක් ඉදිරියට යා හැකියි කියලායි. නමුත් අපි විවෘත විය යුතුයි.
බලාපොරොත්තුවන එම සිග්‍ර දියුණුව අපට ලබා ගැනීමට නොහැකි වුණේ මේ රට තුළ පමණක් කටයුතු කළයුතුයි කියා ජනතා විමුක්ති පෙරමුණ වැනි පක්ෂ පැවසු නිසයි. කිසිවෙකු එලෙස සාර්ථක වී නැහැ. සිංගප්පූරුව, හොංකොං ඇතුළු සාර්ථකත්වයක් ලබා තිබෙන රටවල් දෙස බැලු විට ඒ බව තහවුරු වෙනවා. ඒ නිසා අප එම රටවල් දෙස බලා කටයුතු කළයුතුයි.
ප්‍රශ්නය
ජනාධිපතිතුමනි ඔබතුමා විවිධ දුෂණ විරෝධි වංචාවන් වැළැක්වීමට නීති හඳුන්වා දුන්නා. නමුත් මෙය තෝරු මොරු ටික බේරිලා පොඩි හාල් මැස්සෝ අහුවෙන නීති පද්ධතියක් බවට ජනතාව අතර මතයක් තිබෙනවා.
පිළිතුර
එහෙම අල්ලගත්ත හාල් මැස්සෝ කවුද කියලා ඔබට නම් කළ හැකිද, මේ ක්‍රමය තුළින් මෝරු නොවෙයි, හාල්මැස්සොත් අල්ලාගෙන එනවා. 2015 අපි බලයට පත් වූ විට මේ පිළිබඳ සොයා බැලීමට කණ්ඩායම් කිහිපයක් පත් කළා. ජනාධිපතිවරයා යටතේ එක් අංශයක් තිබුණා.
ඒ වගේම පොලිසියේ අපරාධ පරීක්ෂණ දෙපාර්තමේන්තුව තිබුණා. පොලිසියේ තවත් වෙනම ඒකකයක් අපි ඇති කර තිබුණා. අල්ලස් කොමිසම තිබුණා. නීතිපති දෙපාර්තමේන්තුවෙන් දුෂණ විරෝධි ලේකම් කාර්යාලය දාලා තිබුණා.
මේ සියල්ල පත් කරලත් ඇතැම් ස්ථානවල නීතිමය ප්‍රශ්න ඇති වුණා. ඒ නිසයි අප මේ නව ක්‍රමවේදය ගෙනැවිත් තිබෙන්නේ. ඇතැම් අය අයුතු ලෙස ආදායම් උපයා ගත්තානම් එයට විරුදධව කටයුතු කරනවා.එම කටයුතු සඳහා අවශ්‍ය පිරිස් පුහුණු කිරීමද අවශ්‍යව තිබෙනවා.
ප්‍රශ්නය
කෘත්‍රිම බුද්ධිය විවිධ ක්ෂේත්‍රයන් තුළ ජනප්‍රිය වෙමින් පවතිනවා. ඒ අනුව කෘත්‍රිම බුද්ධිය අනාගත දේශපානලනයට සහ ආර්ථිකයට මොන වගේ බලපෑමක් සිදු කරයි.
පිළිතුර
කෘත්‍රිම බුද්ධිය අප සමාජයේ මෙන්ම ආර්ථිකයට යොදවන්නේ කෙසේද යන්න පිළිබඳ අප සාකච්ඡා කළ යුතුයි. එය අන්තර්ජාතික ආයුධයක් බවට පත් විය හැකියි. තවමත් ලෝකයේ රටවල් මේ පිළිබඳව සාකච්ඡා කරමින් පවතිනවා. ඒ වගේම මේ පිළිබඳව නීති සකස් කරමින් තිබෙනවා. ඉදිරි දශකයේදි සාකච්ඡා කිරීමට ඇත්තේ මේ පිළිබඳවයි. කෘත්‍රිම බුද්ධියෙන් අපට ඇති වෙන්නත්, නැති වෙන්නත් පුළුවන්.
එහිදී කෘත්‍රිම බුද්ධියෙන් ලබා ගත හැකි ප්‍රයෝජන මොනවාද යන්නත් එය පාලනය කළ හැකි වන්නේ කෙසේද යන්නත් ඇතුළත් නීතිමය රාමුවක් සකස් කර ගැනීමට අපට තවමත් නොහැකි වී තිබෙනවා. එය ඒ තරම් නවීන සංකල්පයක් බව කිවයුතුයි. කාලයත් සමඟ මේ සියලු දේ සිදු වනු ඇතියි. කෙසේ නමුත් කෘත්‍රිම බුද්ධිය අවශ්‍ය බව මා පිළිගන්නවා. නමුත් එහි පාලනයක් ද තිබිය යුතුයි.
ප්‍රශ්නය
රාජ්‍ය සේවය කාර්යක්ෂම සේවයක් බවට පත් කිරීමට ඔබතුමාගේ සැලසුම් මොනවාද?
පිළිතුර
වසර 10ක කාලයක් තුළ ඒ සඳහා පියවර ගණනාවක් ගැනීමට තිබෙනවා. රාජ්‍ය සේවයේ ලක්ෂ ගණනක අතිරික්තියක් සිටිනවා. නමුත් ඔවුන්ට ගෙදර යන්න කිව්වොත් සිදු වන්නේ කුමක්ද? මොකද ඔවුන්ට වෙනත් ආදායම් මාර්ග නැහැ.
ඔවුන් පාරට බැහැලා බංග්ලාදේශය වගේ ක්‍රියා කරයි. ඒ නිසා කෙසේ හෝ මේ අයත් සමඟම කටයුතු කළ යුතු වෙනවා. ඔවුන්ගේ වැටුප් ඔවුන් වියදම් කරනවා මිස ලාච්චුවේ දමා තියා ගන්නේ නැහැ. එවිට ඒ මුදල් මේ රටේ ආර්ථිකයට එකතු වෙනවා. මම හිතන්නේ ඔවුන්ගේ අනාගතය අනතුරේ නොදමා ඔවුන් සමඟම මේ කාරණය සිදු කරන්නේ කොහොමද කියා අප සිතිය යුතුයි.
අපේ අවධානය රාජ්‍ය සේවය නවීන රාජ්‍ය සේවයක් කිරීම පිළිබඳවයි. බිම් මට්ටමේත් විශාල සංඛ්‍යාවක් සිටිනවා. ඔවුන්ට නව වැඩසටහන් ලබා දිය යුතු වෙනවා. නමුත් ගංවතුර වැනි හදිසි අවස්ථාවන්හිදී රාජ්‍ය සේවයේ කාර්යක්ෂමතාව ඉහළින්ම දක්නට ලැබෙනවා. ඒ අනුව රාජ්‍ය සේවයේ සාර්ථකත්වය සහ දුර්වල බව කියන දෙකම තිබෙන බව අවබෝධ කරගත යුතුයි.
ප්‍රශ්නය
අවසන් වශයෙන් මේ රටේ ජනතාවට ඔබතුමා දෙන පණිවිඩය කුමක්ද?
පිළිතුර
මම මේ රට බාර ගත්තේ කිසිවෙකුත් එය බාර නොගත් අවස්ථාවකයි. හැමදෙනාම කිව්වේ ආර්ථික ප්‍රශ්නය විසඳන්න බැහැ කියලයි. නමුත් අප අද ආර්ථික ප්‍රශ්නය විසඳමින් රට ස්ථාවර මට්ටමකට ගෙනවිත් තිබෙනවා. මේ ගමන මෙතැනින් අවසන් කරන්න බැහැ.
මේ රටේ ආර්ථිකය නව පරිවර්තනයකට ලක් කළ යුතුයි. අප අපනයන ආර්ථිකයක් බවට පත් විය යුතුයි. අප එතැනට නොගියහොත් රට යළි කඩා වැටෙනවා. එම නිසා මා ජනතාවට කියන්නේ ඔබේ ඉදිරි වසර කිහිපය ගැන සිතා තීරණය ගන්නා ලෙසයි. මා තරුණයන්ට පවසන්නේ ඉදිරි වසර 20 ගැන සිතා තීරණය ගන්නා ලෙසයි.
