ශ්‍රී ලංකා නාවික හමුදාව විසින් දිවයිනේ මුහුදු ප්‍රදේශ කිහිපයක් ආවරණය වන පරිදි සිදු කළ මෙහෙයුම් මගින් නීති විරෝධී ලෙස ධීවර කර්මාන්තයේ යෙදුනු පුද්ගලයින් 54 ක් සහ ධීවර ආම්පන්න නීතියේ රැහැනට හසු කර දීමට කටයුතු කෙරිණි.
උතුරු මැද නාවික විධානය මගින් මන්නාරම වලෙයිපාඩු, පල්ලිමුනේ සහ සවුත්බාර් යන ප්‍රදේශයන්ට ඔබ්බෙන් වූ මුහුදු ප්‍රදේශයන්හි සිදුකල මෙහෙයුම් මගින් බලපත්‍ර රහිතව රාත්‍රී කාලයේ කිමිදුම් කටයුතු සිදු කරමින් සහ තහනම් දැල් භාවිතා කරමින් ධීවර කර්මාන්තයේ යෙදුනු පුද්ගලයින් 32 ක්, ධීවර යාත්‍රා 08ක්, තහනම් දැල් 08 ක් සහ කිමිදුම් උපකරණ කිහිපයක් නාවික හමුදා භාරයට ගැනීමට කටයුතු කෙරිණි
නැගෙනහිර නාවික විධානය මගින් නිලාවේලි අඩුක්කුපාඩු, ත්‍රිකුණාමලය කෝනේෂ්වරම් හා ෆවුල් තුඩුව යන ප්‍රදේශයන්ට ඔබ්බෙන් වූ මුහුදු ප්‍රදේශයන්හි බලපත්‍ර කොන්දේසි උල්ලංඝනය කරමින් සහ නීති විරෝධී දැල් භාවිතා කරමින් ධීවර කර්මාන්තයේ යෙදුනු පුද්ගලයින් 19 ක්, ධීවර යාත්‍රා 05 ක්, තහනම් දැල් 03 ක් සහ තවත් ධීවර ආම්පන්න කිහිපයක් නාවික හමුදා භාරයට ගන්නා ලදි.
එමෙන්ම, වයඹ නාවික විධානය මගින් පුත්තලම උච්චමුනෙයි ප්‍රදේශයට ඔබ්බෙන් වූ මුහුදු ප්‍රදේශයේ එකම ලියාපදිංචි අංකය සහිත ඩිංගි යාත්‍රා දෙකක් නිරීක්‍ෂණය කර ව්‍යාජ ලියාපදිංචි අංකය සහිත ඩිංගි යාත්‍රාව සමඟ සැකකරුවන් දෙදෙනෙක් හා එම ඩිංගි යාත්‍රාව නාවික හමුදා භාරයට ගන්නා ලදි.
තවද, උතුරු නාවික විධානය මගින් ඉලවාලෙයි පොලීසිය හා එක්ව මාදගල්, පන්ඩතිරිප්පු ප්‍රදේශයේ සිදු කරන ලද සෝදිසි මෙහෙයුමකදී බලපත්‍ර රහිතව හක් බෙල්ලන් කවච 3840ක තොගයක් නීති විරෝධි ලෙස තබාගෙන සිටි පුද්ගලයෙක් අත්අඩංගුවට ගන්නා ලදි.
මෙලෙස නාවික හමුදා භාරයට ගත් සහ අත්අඩංගුවට ගත් පුද්ගලයින් වයස අවුරුදු 21 ත් 64 ත් අතර වයසේ පසුවන මන්නාරම, නිලාවේලි, පොඩුවකට්ටු, කුච්චවේලි, කින්නියා, කල්පිටිය සහ ඉලවාලෙයි යන ප්‍රදේශයන්හි පදිංචිකරුවන් වන අතර, මෙම පුද්ගලයින්, ධීවර යාත්‍රා, තහනම් දැල්, කිමිදුම් උපකරණ සහ ධීවර ආම්පන්න ඉදිරි පරීක්‍ෂණ කටයුතු සඳහා ජයපුරම් සහ ඉලවාලෙයි පොලිස් ස්ථාන වෙතත්, මන්නාරම සහ ත්‍රිකුණාමලය සහකාර ධීවර අධ්‍යක්‍ෂක කාර්යාල වෙත සහ කල්පිටිය ධීවර පරීක්‍ෂක කාර්යාලය වෙතත් භාරදීමට කටයුතු කෙරිණි.
