ශ්‍රී ලංකාවේ දැනට වාර්තා වන කොවිඩ් මරණ හා ආසාදිතයන්ගේ සංඛ්‍යාව අඛණ්ඩව වාර්තා වුවහොත් ලබන වසරේ ජනවාරි මාසය වනවිට කොවිඩ් ආසාදිතයන් 18,000ක් පමණ මිය යනු ඇතැයි ලෝක සෞඛ්‍ය සංවිධානය අනතුරු අඟවයි.
ලෝක සෞඛ්‍ය සංවිධානයේ ශ්‍රී ලංකා කාර්යාලය විශේෂඥ වෛද්‍යවරුන්ගේ සහභාගිත්වයෙන් සකස් කළ වාර්තාවක මේ බව සඳහන් වෙයි. මෙම වාර්තාව සෞඛ්‍ය අමාත්‍යාංශයට ඊයේ (12දා) භාරදී ඇත.
මෙම තත්ත්වයෙන් ශ්‍රී ලාංකිකයන් ආරක්ෂා කිරීම සඳහා නිර්දේශ රැසක්ද ඉදිරිපත් කර තිබේ. සංචරණ සීමා දැඩි කිරීම, පළාත් සංචරණ සීමා වෙනුවට දිස්ත්‍රික් සංචරණ සීමා පැනවීම, සුළු කාලයකට හෝ ඇඳිරි නීතිය පැනවීම, සියලුම මහජන උත්සව සති තුනකට තහනම් කිරීම, මහජන ඒකරාශි වීම් වැළැක්වීම, සෞඛ්‍ය සේවකයන් ආරක්ෂා කරගැනීම, ඵලදායී සන්නිවේදන වැඩසටහන් ක්‍රියාත්මක කරමින් ජනතාව දැනුවත් කිරීම, ආසාදිතයන් හා මරණ නිවැරදිව ලබාදීම, වයස අවුරුදු 60 ඉක්මවූවන්ට කඩිනමින් එන්නත් ලබාදීම එම නිර්දේශ වෙයි.
කොවිඩ් ශීඝ්‍ර ව්‍යාප්තියත් සමග ඉදිරි සති දෙක වඩාත් තීරණාත්මක නිසා පුද්ගල සංචරණය පාලනය කිරීම සඳහා බලධාරීන් සුදුසු පියවරක් ගතයුතු බව මහාචාර්ය අර්ජුන ද සිල්වා පවසයි.
මෙම සති දෙක ඇතුළත විවාහ මංගල්‍ය උත්සව අවමංගල්‍ය උත්සවය මෙන්ම කායවර්ධන මධ්‍යස්ථාන වැනි වැඩිපුර කොවිඩ් වයිරසය ආසාදනය විය හැකි ස්ථාන පවත්වාගෙන යාමට ඉඩ ලබානොදිය යුතු බවට ද ඔහු අවධාරණය කරයි.
ඔහු ප්‍රකාශ කළේ මොනයම් හෝ හේතුවකට රට ලොක්ඩවුන් එකකට පත්නොකරනවා නම් රට ලොකප් කළ යුතු බවය.
මෙම සති දෙක තුළ ජනතාව පාරට නොබැස කටයුතු කළ යුතු බවත් රජය සහ අදාළ පාර්ශ්වයන් එකතු වීමේ කාලය ඇතුළත කොවිඩ් ව්‍යාප්තිය අවම කර ගැනීමට කටයුතු කළ යුතු බවද මහාචාර්ය අර්ජුන ද සිල්වා පැවැසීය.
