මෙරට ජනතාව කාලයක් පුරා නව දේශපාලන සංස්කෘතියක් අපේක්ෂා කළ බව සමගි ජනබලවේග පාර්ලිමේන්තු මන්ත්‍රී දයාසිරි ජයසේකර මහතා පවසනවා.
ඒ අනුව මේ වනවිට පාර්ලිමේන්තුවේ නව මුහුණු රැසක් දක්නට ලැබෙන බවත්, ඒ සම්බන්ධයෙන් සතුටු වන බවත් දයාසිරි ජයසේකර මහතා කියා සිටියා.
එමෙන්ම ජාතිවාදය වපුරන බව පවසමින් අත්අඩංගුවට ගන්නා අය සම්බන්ධයෙන් නීතිය ක්‍රියාත්මක වන්නේ දෙවිදිහකට බවයි ඒ මහතා පෙන්වා දුන්නේ.
එය උතුරට එක ආකාරයකටත්, දකුණට තව ආකාරයකටත් ක්‍රියාත්මක වන බව එහිදී අදහස් දක්වමින් පාර්ලිමේන්තු මන්ත්‍රීවරයා ප්‍රකාශ කළා.
මේ ඒ සම්බන්ධයෙන් වැඩිදුරටත් අදහස් දැක්වූ සමගි ජන බලවේග පාර්ලිමේන්තු මන්ත්‍රී දයාසිරි ජයසේකර මහතා,
“ජාතිවාදය වපුරනවා කියලා අත්අඩංගුවට ගත් දකුණේ අයට ත්‍රස්ත පනත යටතේත්, උතුරේ අයට දණ්ඩ නීති සංග්‍රහය යටතේත්, දෙවදියකට නඩු පවරන්නේ ඇයි?.. එකම කාරණාවට කොටස් දෙකකට, පනත් දෙකක් යටතේ නඩු පවරන්නේ ඇයි?.. දන්නේ නැත්නම් පොලිසියට නීතිපති උපදෙස් ගන්න කියන්න.. රටට වඩා වේගයෙන් තමන්ගේ පුද්ගලික පරමාර්ථ පෙරදැරි කරගෙන, පවුල වර්ධනය කිරීමත්, ගජමිතුරු දේශපාලනයත් නිසා අද පැරණි දේශපාලන පක්ෂ මේ රටෙන් අතුගෑවිලා ගිහින් තිබෙනවා.. අලුත් වෙන්න සූදානම් නැති පක්ෂ අතුගා දමා නව දේශපාලකයින් පාර්ලිමේන්තුවට ගේන්න ජනතාව කටයුතු කර තිබෙනවා.. අද මෙතන අලුත් මුහුණු ගොඩක් දකින්න ලැබෙනවා.. ඒ ගැන සතුටු වෙනවා.. ජනතාව අලුත් දේශපාලනයක් කාලයක් තිස්සේ බලාපොරොත්තු වුණා.. ඒ බලාපොරොත්තු පසුගිය හැම ආණ්ඩුවක් තුළම බිඳ වැටුණා.. ඉතාමත් විනය ගරුක සංවිධානාත්මක ක්‍රියාවලියක් තුළ ඔබ මේ ජයග්‍රහණය කර තිබෙනවා.. ඔංචිල්ලාව උඩට යනවා වගේම ආපස්සට එන බව මතක තබාගෙන ලැබු ජයග්‍රහණයෙන් උද්දාමයට පත් නොවී දුන් පොරොන්දු ඉටුකරන්න.. හිටපු ජනාධිපතිවරුන්ගේ සහ මන්ත්‍රීවරුන්ගේ වරප්‍රසාද කප්පාදු කරනවා කියලා රටේ රැල්ලක් හැදුවත්, ආණ්ඩුක්‍රම ව්‍යවස්ථාවට අනුව ලබාදී තිබෙන හිටපු ජනාධිපතිවරුන්ගේ වරප්‍රසාද කප්පාදු කරන්න බැහැ.. මන්ත්‍රී වරප්‍රසාද ගැන කියපු කතා අද වෙනස් වෙලා.. ගජමිතුරු දේශපාලනය නෑ කිව්වට කැළණිය හා ජයවර්ධනපුර විශ්වවිද්‍යාලවල තමන්ගේ මිතුරන්ට ඇමතිකම් දීලා, ලේකම් තනතුරු දීලා.. හාල් ඇටයක්වත් පිටරටින් ගේන්නේ නැහැ කිව්වාට, දැන් හාල් ගේන්න පටන් අරන්.. ණය තිරසරකරණය පිළිබඳ අලුත් යෝජනා ගේනවා කිව්වාට දැන් ඒක කරන්න බැරි වෙලා තිබෙනවා.. අපි මේ ආණ්ඩුවේ යහපත් සියලු දේට සහය දෙනවා.. ඒ වගේම කියපු දේ කරනවද කියලාත් අපි බලන් ඉන්නවා..”
