මීට මාස කිහිපයකට පෙර පැවති තත්ත්වයට සාපේක්ෂව අද වන විට ආර්ථික සහ මූල්‍ය වශයෙන් වඩා යහපත් මට්ටමක සිටින ශ්‍රී ලංකාවට තවදුරටත් සහයෝගය දෙන බවට ලෝක බැංකුව සහතික වී තිබේ.
ලෝක බැංකුවේ අනුග්‍රහය සහිත ප්‍රතිසංස්කරණ ක්‍රමානුකූලව ක්‍රියාත්මක කිරීම පිළිබඳ සහ ශ්‍රී ලංකාව ලබා ඇති ප්‍රගතිය පිළිබඳ ප්‍රශංසා කරන බවද මෑත කාලයේ මුහුණදුන් අභියෝග පසෙකලා ඉදිරියට ගමන් කරන ශ්‍රී ලංකා ක්‍රියාත්මක කර තිබෙන ආර්ථික ප්‍රතිසංස්කරණ තුළ පූර්ණ සහාය දෙන බවද ලෝක බැංකුවේ දකුණු ආසියානු කලාපයේ උප සභාපති මාර්ටින් රයිසර් මහතා අවධාරණය කරයි.
අමෙරිකා එක්සත් ජනපදයේ වොෂිංටන් නගරයේදී මේ දිනවල පැවැත්වෙන IMF/WB වසර මැද සමුළුවට සහභාගි වී සිටින මුදල් රාජ්‍ය ඇමැති ශෙහාන් සේමසිංහ මහතා සමඟ පැවැති විශේෂ සාකච්ඡාවකදී ලෝක බැංකුවේ දකුණු ආසියානු කලාපයේ උප සභාපතිවරයා මේ බව ප්‍රකාශ කර තිබේ.
ජාත්‍යන්තර මූල්‍ය අරමුදල, ලෝක බැංකුව සහ G20 රටවල් විසින් මෙහෙයවන ගෝලීය ස්වෛරී ණය වටමේස සාකච්ජාවට මුදල් රාජ්‍ය ඇමැති ශෙහාන් සේමසිංහ මහතා සහභාගි වී තිබෙන අතර එම සාකච්ඡාව බෙහෙවින්ම සාර්ථක වූ බව මුදල් අමාත්‍යාංශය පවසයි. මේ හමුවේදී ණය ගැටලු ඉක්මනින් විසඳාගැනීමට රටවලට සහාය වීම පිළිබදව සාකච්ඡා කර තිබෙන අතර එය ණයහිමියන් සහ ණයගැති රටවල පොදු ඉල්ලීමක් වී තිබේ. මේ වටමේස සාකච්ඡා අතරතුර ජාත්‍යන්තර මූල්‍ය අරමුදලේ කළමනාකාර අධ්‍යක්ෂ ක්‍රිස්ටලිනා ජෝර්ජිවා මහත්මිය හමු වීමටද මුදල් රාජ්‍ය ඇමැතිවරයාට අවස්ථාව හිමි වී ඇත.
මේ අතර ලෝක බැංකුවේ දකුණු ආසියා කලාපයේ උප සභාපති මාර්ටින් රයිසර් මහතා සමඟ හමුවක්ද පවත්වා තිබෙන අතර, එහිදී මීට මාස කිහිපයකට පෙර ශ්‍රී ලංකාව පැවති තත්ත්වය සිහිපත් කළ අතර අද වන විට රට වඩාත් යහපත් තත්ත්වයක පවතින බව රයිසර් මහතා අවධාරණය කර තිබේ. ලෝක බැංකුවේ අනුග්‍රහය ඇති ප්‍රතිසංස්කරණ ක්‍රමානුකූලව ක්‍රියාත්මක කිරීම පිළිබඳව සහ ශ්‍රී ලංකාව ලබා ඇති ප්‍රගතිය පිළිබඳ ඔහු ප්‍රශංසාව පළ කර තිබෙන අතර, ලෝක බැංකු මූල්‍යකරණයේ මීළඟ වටය ලබාගැනීම සඳහා ඉදිරි ප්‍රතිසංස්කරණ පිළිබඳවද මෙහි දී සාකච්ඡා කර තිබේ. ලෝක බැංකුව, ශ්‍රී ලංකාවට තවදුරටත් අබණ්ඩ සහයෝගය දෙන බව මාර්ටින් රයිසර් මහතා සහතික වී ඇත.
ලෝක බැංකු සමූහයේ ප්‍රධාන පරිපාලන නිලධාරි වෙන්කායි ෂැං මහතා සහ මුදල් රාජ්‍ය ඇමැති ශෙහාන් සේමසිංහ මහතා අතර හමුවක්ද පවත්වා තිබෙන අතර චීනයේ එක්සිම් බැංකුවේ හිටපු උප සභාපති ලෙස ඔහු ශ්‍රී ලංකාවට දුන් සහයෝගයට මෙහිදී ශ්‍රී ලංකාව පාර්ශ්වයෙන් ස්තුතිය පළ කර ඇත. මෑතකාලීන ආර්ථික වර්ධනයන් සහ ශ්‍රී ලංකාවේ ණය ප්‍රතිව්‍යූහගත කිරීමේ ක්‍රියාවලියේ ප්‍රගතිය එහිදී සාකච්ජා කෙරිණි. ලෝක බැංකුවේ පූර්ණ සහයෝගය ශ්‍රී ලංකාවට දෙන බවද වෙන්කායි ෂැං මහතා වැඩිදුරටත් සඳහන් කර ඇත.
මේ අතර එක්සත් ජනපද භාණ්ඩාගාරයේ නියෝජ්‍ය සහකාර ලේකම් රොබට් කප්‍රෝත් මහතා සහ මුදල් රාජ්‍ය ඇමැති ශෙහාන් සේමසිංහ මහතා අතර ද්විපාර්ශ්වික සාකච්ඡාවක් පවත්වා තිබෙන අතර, ශ්‍රී ලංකාවේ මෑතකාලීන ආර්ථික වර්ධනයන්, ණය ප්‍රතිව්‍යූහගත කිරීමේ ප්‍රගතිය, බදු පරිපාලනය ශක්තිමත් කිරීම සහ දැනට ක්‍රියාත්මක වන පාලන ප්‍රතිසංස්කරණ පිළිබඳව එහිදී සාකච්ජා කළ බවද අමෙරිකා එක්සත් ජනපදය ශ්‍රී ලංකාවට සෑම අතින්ම උපරිම සහයෝගය දෙන බවට එහිදී සහතික වී තිබෙන බවද මුදල් අමාත්‍යාංශය පවසයි.
