කොළඹ පෝට් සිටි මරීනා සක්මන් මළුවේ අධික නරඹන්නන් පිරිසක් එක ගොඩේ ගැවසීම නිසා “වරාය නගර පොකුරක්” මතුවීමේ තර්ජනයක් මතුවෙමින් තිබෙන බවට සෞඛ්‍ය අමාත්‍යාංශය අනතුරු අඟවා ඇතැයි වාර්තා විය.
පසුගිය සතියේ උත්සවාකාරව විවෘත කරන්නට යෙදුණ Colombo Port City Marina Promenade වෙත මහජනයාට පැමිණීමට ආරාධනා කෙරුණ අතර ඒගැන ඉහළ ප්‍රසිද්ධියක්ද මාධ්‍ය මගින් සිදු කරනු ලැබීය අනතුරුව දිවයිනේ නන්දෙසින් ඒ වෙත විශාල ජනකායක් පැමිණෙමින් සිටින බැවින් කොරෝනා පොකුරක් මතුවීම පිළිබඳ බියක් මතුව තිබේ.
පසුගිය දින කිහිපය තුළ මහජනතාව සක්මන් මළුව පරිශ්‍රය තුළ පවා සමාජ දුරස්ථභාවය පවත්වා නොතිබුණි. දිගු සති අන්තයේ සක්මන් මළුවට ඇතුළු වූ විශාල ජනකායක් අතර සිටි කිහිප දෙනෙක් මුහුණු ආවරණ පැළඳ නොසිටි බවද වාර්තා විය.
