පාපැදි භාවිතය ප්‍රවර්ධනය සඳහා පියවර ගන්නා බව පරිසර අමාත්‍ය මහින්ද අමරවීර මහතා පැවසීය.
වායු දූෂණය අවම කිරීමේ පියවරක් වශයෙන් පාපැදි භාවිතය ප්‍රවර්ධනය සඳහා පියවර ගැනීමට අමාත්‍ය මණ්ඩල පත්‍රිකාවක් සකස් කර ඇති බව ද ඇමතිවරයා සඳහන් කළේය.
ඒ අනුව පාපැදිවලට ගමන් කිරීම සඳහා සෑම මාර්ගයකම මංතීරුවක් වෙන් කිරීම, පරිසර අමාත්‍යාංශයට අනුබද්ධ ආයතනවල පාපැදිවලින් පැමිණෙන සේවකයින් සඳහා ප්‍රවර්ධන ප්‍රතිලාභයන් ලබා දීමේ නියාමණ වැඩ සටහනක් හඳුන්වා දීමට ද තීරණය කර ඇතැයි අමාත්‍යවරයා කීවේය.
නගරවල වාහන තදබදය ඇති අවස්ථාවල ධාවනය වන වාහනයක් වෙනුවෙන් එක් කිලෝමීටරයක් සඳහා රජයට රුපියල් 103.56ක වියදමක් දැරීමට සිදුව ඇති බව සමීක්ෂණයකින් අනාවරණය වී ඇතැයි ද ඇමතිවරයා පැවසීය.
මහින්ද අමරවීර මහතා මේ බව පැවසුවේ පාපැදි භාවිතා කිරීම ප්‍රවර්ධනය කිරීම සඳහා Ride for Life සංවිධානය විසින් ක්‍රියාත්මක කර තිබෙන සුව දිවියට පාපැදිය වැඩ සටහන සම්බන්ධව අද (26) සාකච්ඡාවකින් පසු පැවැති මාධ්‍ය හමුවක දීය.
පාපැදිය භාවිතා කිරීම මගින් කිලෝමීටරයකට රුපියල් 236.48ක් ඉතිරි කර ගත හැකි වන අතර රජයට සිදුවන ලාභය රුපියල් 339.98ක් බවද අමාත්‍යවරයා සඳහන් කළේය.
Ride for Life සංවිධානය වෙනුවෙන් වෛද්‍ය අසේල අබේධීර මහතා ද මෙහිදී අදහස් දැක්වීය.
