එක්සත් ජනපදය ලෝක සෞඛ්‍ය සංවිධානයෙන් ඉවත් කිරීමේ නියෝගයට අමෙරිකානු නව ජනපති ඩොනල්ඩ් ට්‍රම්ප් අත්සන් තබා තිබේ.
අමෙරිකානු ජනාධිපතිවරයා එම නියෝගය මගින් පවසා ඇත්තේ ගෝලීය සෞඛ්‍ය සංවිධානය කෝවිඩ් වසංගතය සහ අනෙකුත් ජාත්‍යන්තර සෞඛ්‍ය අර්බුද වැරදි ලෙස හසුරවා ඇති බවය.
ඇමෙරිකා එක්සත් ජනපදයේ 47 වැනි ජනාධිපතිවරයා ලෙස ඊයේ(20) රාත්‍රියේ එරට අගවිනිසුරු ජෝන් රොබට්ස් ඉදිරියේදී ඩොනල්ඩ් ට්‍රම්ප් දිවුරුම් දෙනු ලැබීය. අමෙරිකානු කොංග්‍රසය රැස්වන, වොෂින්ටන් අගනුවර පිහිටි කැපිටල් ගොඩනැගිල්ලේ රොටුන්ඩා ශාලාවේදී පදවි ප්‍රාප්ති උත්සවය පැවැත්විණ.
ඩොනල්ඩ් ට්‍රම්ප්ගේ බිරිඳ වන මෙලානියා ට්‍රම්ප් ඇතුළු ඔහුගේ පවුලේ සමීපතමයින් ද ඊට එක්ව සිටි අතර බැරැක් ඔබාමා, බිල් ක්ලින්ටන් සහ ජෝර්ජ් ඩබ්ලිව් බුෂ් ඇතුළු අමෙරිකාවේ හිටපු ජනාධිපතිවරුන් මෙන්ම, එලෝන් මස්ක්, ජෙෆ් බේසොස් සහ මාක් සකර්බර්ග් වැනි තාක්ෂණ ලෝකයේ දැවැන්තයින් සහ සුපිරි ධනවතුන් පිරිසක් ද එම අවස්ථාවට එක්ව සිටි බව විදෙස් මාධ්‍ය වාර්තා කරයි.
අමෙරිකාවේ නව උපජනාධිපතිවරයා ලෙස ජේ. ඩී. වෑන්ස් දිවුරුම් දීමෙන් පසු, ඩොනල්ඩ් ට්‍රම්ප් දිවුරුම් දුන් අතර ඉන් අනතුරුව අමෙරිකාවේ 47 වැනි ජනාධිපතිවරයා ලෙස පළමු වරට ට්‍රම්ප් විසින් සිය ජනතාව ආමන්ත්‍රණය කළේය.
හිටපු ජනාධිපතිවරයාගේ නික්ම යෑම වෙනුවෙන් ඩොනල්ඩ් ට්‍රම්ප්, ජනාධිපති ආර්යාව සහ නව උපජනාධිපති ජේ. ඩී. වෑන්ස් සහ ඔහුගේ බිරිඳ කැපිටල් ගොඩනැගිල්ලෙන් පිටතට පැමිණියහ.
පළමුවෙන්ම, පසුගිය ජනාධිපතිවරණයේ ඩොනල්ඩ් ට්‍රම්ප්ගේ ප්‍රතිවාදියා වූ හිටපු උපජනාධිපතිනී කමලා හැරිස් සහ ඇයගේ සැමියා කැපිටල් ගොඩනැගිල්ලෙන් පිටව ගිය අතර ඉන් අනතුරුව හිටපු ජනාධිපති ජෝ බයිඩන් සහ ජිල් බයිඩන් නව ජනාධිපතිවරයාට සමුදී කැපිටල් ගොඩනැගිල්ලෙන් පිටව ගියේ ය.
කැපිටල් ගොඩනැගිල්ලේම පිහිටි ජනාධිපති කාර්යාලයේ සිට ඩොනල්ඩ් ට්‍රම්ප් නිල වශයෙන් සිය වැඩ භාරගැනීමේ පත්‍රිකාවලට අත්සන් තැබුවේ ඉන් අනතුරුවයි.
දැඩි ශීත කාලගුණය හේතුවෙන් මෙවර කැපිටල් ගොඩනැගිල්ල ඉදිරිපිටට පාක්ෂිකයින්ට රැස්වීමට අවස්ථාව හිමි නොවූ අතර, ඒ හේතුවෙන් සිය පාක්ෂිකයින් හමුවීමට ට්‍රම්ප්ට “කැපිටල් වන් අරීනා” ක්‍රීඩාගාරය වෙත යාමට සිදු විය. එහිදී ජනාධිපතිවරයාට රැස්ව සිටි පිරිසගෙන් ලැබුණේ උණුසුම් පිළිගැනීමකි.
අලංකාර පෙළපාලියකින්ද වර්ණවත් වූ සැමරුම් උත්සවය අවසානයේ ඩොනල්ඩ් ට්‍රම්ප් සිය ආධාරකරුවන් ඉදිරියේ විධායක නියෝග කිහිපයකට අත්සන් තැබුවේය. එක්සත් ජාතීන්ගේ පැරිස් සම්මුතියෙන් අමෙරිකාව යළිත් ඉවත් කරගැනීම ඒ අතරින් සුවිශේෂී වේ. හමුදා ඇතුළු කාණ්ඩ කිහිපයක් හැර අනෙකුත් සියලුම රජයේ රැකියා සඳහා වන බඳවා ගැනීම් යළි දැනුම් දෙන තුරු අත්හිටුවීම ද එහිදී සිදු කෙරුණි.
මීළඟට ධවල මන්දිරයට පැමිණෙන ජනාධිපතිවරයා තවත් නියෝග රැසකට අත්සන් තැබීමට නියමිත අතර තවත් සැමරුම් උත්සව කිහිපයක්ද අද දහවල් පැවැත්වෙනු ඇති.
1902 වසරෙන් පසු වාර දෙකකදී (අඛණ්ඩ නොවන) අමෙරිකානු ජනාධිපතිවරයා ලෙස පත්වුණු පළමු පුද්ගලයා ලෙස ඩොනල්ඩ් ට්‍රම්ප් ඉතිහාස ගත වේ. අපරාධ නඩු විභාගයකින් වරදකරු වූ පුද්ගලයෙකු අමෙරිකානු ජනාධිපතිවරයා ලෙස දිවුරුම් දුන් පළමු අවස්ථාව ලෙසද මෙය ඇමෙරිකානු දේශපාලන ඉතිහාසයට එක්වීම විශේෂත්වයකි. පළමු ධුර කාලයේදී දෝශාභියෝග දෙකකට මුහුණ දුන් ඔහු ඝාතන ප්‍රයත්න දෙකකින්ද දිවි ගලවා ගෙන ඇත.
