දිගින් දිගටම ක්‍රම වෙනසක් රට ඉල්ලා සිටි තත්ත්වයක් තුළ, පක්ෂ දේශපාලණය තුළ පමණක් නොව සිවිල් සිංවිධාන තුළද එම ක්‍රම වෙනස සදහා සූදානම් විය යුතු බව රයිට් ටු ලයිෆ් මානව හිමිකම් සංවිධානයේ විධායක අධ්‍යක්ෂක පිලිප් දිසානායක මහතා පවසා සිටියාය. ඔහු මේ අදහස් ප්‍රකාශ කලේ මානව හිමිකම් ක්‍රියාධරයන් වෙනුවෙන් අද (29) මීගමුවේ සංවිධානය කර තිබූ විශේෂ සාකච්ඡාවක දීය.
මානව හිමිකම් ඇතුළු ප්‍රජාතන්ත්‍රවාදී අවකාශය සුරක්ෂිත කිරීම හා එය තවදුරටත් පුළුල් කිරීම අපගේ මූලික අරමුණ වන බවත්, එය සුරක්ෂිත කිරීම සදහා ආර්ථිකය සුරක්ෂිත විය යුතු බවත් ඔහු පැවසීය. ආර්ථිකයක් කඩා වැටුන රටක මානව හිමිකම් ඇතුළු ප්‍රජාතන්ත්‍රවාදී අයිතිවාසිකම් කිසිවෙකුට අපේක්ෂා කළ නොහැකි බවත්, එය 2022 දී අප අත් විදි බවත් වර්තමානයේ දී බංගලදේශයේ වැසියන් එය බුක්තිවිදිමින් සිටින බවත් ඔහු පැවසීය.
ඒ නිසා කවුරු බලයේ සිටියත් ආර්ථික ප්‍රථිසංස්කරණ ක්‍රියාවලිය ඉදිරියට ගෙන යාම සදහා සිවිල් සමාජයේ පුර්ණ සහාය අප ලබා දිය යුතු බවත්, IMF සංවිධානය සමග ඇති කරගෙන තිබෙන එකගත්වයන් මත කටයුතු කිරීම සදහා සිවිල් සමාජය ලෙස අප බලපෑම් කළ යුතු බවට ඔහු යෝජනා කරන ලදී. පත් වූ විවිධ රජයන් විසින් අත්තනෝමතික ලෙස මුදල් නෝට්ටු මුද්‍රණය නවතා දැමීම, මහ බැංකුව ස්වාධීන කිරීම, රජයේ අනවශ්‍ය වියදම් කපා හරිමින්, වියදම් පාලනය කර ප්‍රථමික ගිණුමේ අතිරික්තයක් පවත්වාගෙන යාම වැනි IMF යෝජනා රටට ඉතා හිතකර යෝජනා බවත්, එම යෝජනා ක්‍රියාත්මක කිරීම හේතුවෙන් රටේ ආර්ථිකය ක්‍රමයෙන් ස්ථාවර වෙමින් පවතින බවත්, එම වැඩපිළිවෙල සමග යාම හැර වෙන විකල්පයක් අපට දැනට නැති බවත් ඔහු පැවසීය.
නව රජයේ ප්‍රධාන පොරොන්දුවක් වන අල්ලස හා දූෂණය වැලැක්වීම හා නීතියේ ආධිපත්‍ය සුරක්ෂිත කිරීම යන කාරණා සිවිල් සමාජය දශක කිහිපයක් තිස්සේ ඉදිරිපත් කළ යෝජනා නිසා ඒ ක්‍රියාවලියට සහාය දැක්වීමට කිසිදු භාදාවක් සිවිල් සමාජයට නොමැති බවත්, ඒ සමගම ජාතික සමගිය ගොඩනැගීම සදහා බලය බෙදීම හා සංක්‍රාන්ති යුක්තිය ගොඩනැගීමේ ක්‍රියාවලිය ශක්තිමත් කිරීමත් සදහා ආණ්ඩුවේ අවධානය යොමු කළ යුතුව ඇතැයිද ඔහු වැඩි දුරටත් පැවසීය.
පසුගිය රජයන් කිහිපයක්ම විසින්ම රාජ්‍ය නොවන සංවිධාන පාලනය කිරීම සදහා ගෙන ඒමට නියමිතව තිබූ පනත සම්බන්ධව වත්මන් රජයේ ස්ථාවරය කුමක්ද යන්න තවම පැහැදිලි නැතත්, ඒ සම්බන්ධව රජය සමග සාකච්ඡා ආරම්භ කළ යුතු බවත්, එහි වෙනසක් සිදු කරන්නේ නම් සිවිල් සමාජය විසින් මේ වන විට ඉදිරිපත් කර ඇති යෝජනා මත පදනම් එය සිදු කිරීම සදහා බලපෑම් කළ යුතු බවත්, සම්බන්ධතා ඇති අය දැන්මම ඒ සදහා මැදිහත් විය යුතු බවත් ඔහු පැවසීය.
