ගම්පහ කලගෙඩිහේන ප්‍රදේශයේ පිහිටි නිවසක පිටුපස තිබූ දර මඩුවක ටී 56 වර්ගයේ ගිනි අවි සහ ක්ලේමෝ බෝම්බයක් ඇතුළු ආයුධ සහ පුපුරන ද්‍රව්‍ය සඟවා තබා එම අවි සහ පුපුරන ද්‍රව්‍ය හිටපු නියෝජ්‍ය පොලිස්පති වාස් ගුණවර්ධන මහතා ඇතුළු සැකකරුවන්ට අයත් යැයි කියමින් කොළඹ ප්‍රධාන මහෙස්ත්‍රාත් අධිකරණයේ නඩුවකට බොරු සාක්ෂි නිර්මාණය කළැයි කියන සිද්ධිය සම්බන්ධයෙන් චෝදනා ලැබ සිටින අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතා ඇතුළු සැකකරුවන් සිව්දෙනා නීතිපති උපදෙස් මත ගම්පහ මහෙස්ත්‍රාත් ශිලනි චතුරන්ති පෙරේරා මහත්මිය ඊයේ (25 දා) එම චෝදනාවලින් නිදහස් කළාය.
මෙම නඩුව තවදුරටත් ඉදිරියට පවත්වාගෙන නොයන බවට නීතිපති උපදෙස් මහෙස්ත්‍රාත් අධිකරණය වෙත ලැබී ඇති බව පැවසූ මහෙස්ත්‍රාත්වරිය නීතිපති උපදෙස් අභිබවා ක්‍රියා කිරීමට මහෙස්ත්‍රාත් අධිකරණයකට බලයක් නොමැති බව පැවසුවාය.
කොළඹ අපරාධ කොට්ඨාසයේ පොලිස් පරීක්ෂක ජගත් නිශාන්ත, එම කොට්ඨාසයේ ස්ථානාධිපති ප්‍රධාන පොලිස් පරීක්ෂක ඇන්ස්ලම් ද සිල්වා යන නිලධාරීහු පැමිණිල්ල වෙනුවෙන් පෙනී සිටියහ.
මල්දෙනිය හේරත්, සජීව එරන්ද, ෂැනන් තිලකරත්න, හපීල් ෆාරිස් යන නීතිඥ කණ්ඩායම සමග ජ්‍යෙෂ්ඨ නීතිඥ චමින්ද අතුකෝරල මහතා සැකකරුවන් වෙනුවෙන් පෙනී සිටියේය.
