ආන්දෝලනයට තුඩු දුන් නුවරඑළිය ඓතිහාසික තැපැල් කන්තෝරුව පිටරට සමාගමකට විකුණා දැමීමේ තීරණයට විරුද්ධ වී නුවරඑළිය තැපැල් කාර්යාලය තැපැල් දෙපාර්තමේන්තුවට රැක ගැනීම වෙනුවෙන් සහයෝගය දුන් රාජ්‍ය නිලධාරීන්, තැපැල් දෙපාර්තමේන්තුවේ උසස් නිලධාරීන්, සේවක මණ්ඩලය ඇතුළු පොදු ජනතාව මෙන්ම මාධ්‍යයට ස්තුතිය ප්‍රකාශ කිරීමේ මාධ්‍ය හමුවක් පෙරේදා (15) නුවරඑළිය තැපැල් කාර්යාලයේදී පැවැත්විණ.
මෙම මාධ්‍ය හමුව නුවරඑළිය ජාතික ජන බලවේගයේ තැපැල් වෘත්තීය සේවා සංගමය විසින් සංවිධානය කරනු ලැබ තිබූ අතර, එම අවස්ථාව සඳහා ජාතික ජන බලවේගයට අනුබද්ධිත වෘත්තීය සමිති රැසක නියෝජිතයන් රැසක් සහභාගී වී සිටියහ.
නුවරඑළිය දිස්ත්‍රික් ජාතික ජන බලවේගයේ තැපැල් සේවක සංගමයේ අනුශාසක දඹගොල්ලේ සෝමානන්ද හිමි, නුවරඑළියේ අයිතීන් සුරැකීමේ සංවිධානයේ කැඳවුම්කරු නිලාන්ද ද සොයිසා, තැපැල් හා විදුලි සංදේශ නිලධාරීන්ගේ සංගමයේ නුවරඑළිය ශාඛා ලේකම් අජන්තා හිටිහාමු, සමස්ත ලංකා විදුලි පණිවිඩ සේවක සංගමයේ නුවරඑළිය ශාඛා ලේකම් එම්.ජී. උපාලි ඥානසේකර යන මහත්ම මහත්මීන් ඇතුළු පිරිස මෙහිදී අදහස් දැක්වූහ. එහිදී වෘත්තීය සමිති නියෝජිතයන් අදහස් දක්වමින් කියා සිටියේ පසුගිය රනිල් වික්‍රමසිංහ මහතාගේ ආණ්ඩුව යටතේ ඓතිහාසික වටිනාකමකින් සමන්විත නුවරඑළිය තැපැල් කාර්යාලය පිටරට සමාගමකට අලෙවි කිරීමට ගත් තීරණය තරයේ හෙළා දකින බවත්, එම තීරණය අත්හිටුවීම පිළිබඳව වත්මන් රජයට ස්තුතිය ප්‍රකාශ කරන බවත්ය.
